集合咗集英社知名漫畫雜誌《週刊少年 Jump》一大堆角色，而且以慶祝 50周年紀念為主題既遊戲《Jump Force》，雖然坊間銷售數字唔錯，不過就一大堆人又話隻 Game 伏，又話隻 Game 只係正方三角齋撳就得，垃圾 Game 咁話。不過經我地編輯部深入鑽研之後，我可以大膽咁話你聽，呢隻野出乎意料之外地有深度！
係正式講遊戲對戰部份之前，點都要講下故事模式先，話晒呢個都係「表面上」最吸引人買既原因。《Jump Force》集合晒咁多超巨型 ip，理論上故仔應該唔會衰得去邊，而且仲有鳥山明原創角色添！
不過作為遊戲評測點都要講下真話，故事模式既劇情雖然未去到話精彩，但係都叫可以接受，亦都見到製作團隊係部份劇情加入各種 Gag，都算叫做有心。
老實講最後大佬個設計都幾 Hea
之但係要推進劇情的話就必需不停接任務，呢 Part 就真係「極度沉悶」。點解咁講？因為故事主軸係講一班叫「Venom」既敵人，掌握一種神秘魔方力量，而呢種力量可以令人充滿負面能量。於事大家熟悉既伙伴就一個一個咁迷失，然後玩家就要逐個逐個咁去打低佢再救返醒佢，而呢個過程大約重覆 20 次左右……嘩悶到呢，都未計下下要 Load Game，唔知 Load 乜春。（所以果啲直播玩故事 Mode 既，真係好鬼死趕客）
故事模式大部份時間都係走黎走去同人接任，跟住打
遊戲初始就有得揀載具，只要按十字鍵「下」就有選單揀
最鐘意係呢架！
而如果玩家想培育自訂角色的話，故事模式就必定要玩，如果唔係你就唔會買多更多既招式同服飾，所以就算故事模式咁悶你都要「捱」，啱啱推出果陣仲無得 Skip 過場劇情添，好在最近已經更新咗。另一樣要彈既，就係推出遊戲前最吸引我既角色「夜神月」，係遊戲入面只係會係故事模式中登場，係無得落場打既，真係令人極度失望。
我既自訂角色就有設定「橡膠火拳槍」
除咗做任務呢 Part 唔掂之外，故事模式入面仲有一個我認為係本作最大既問題，就係全角色講野係，無！表！情！故事開始無耐，第一次見到路飛，佢把聲就笑住咁話「成個基地啲肉都係我既，嘻嘻」，但係個樣係準備殺你全家咁，大佬阿……咪咁痴線啦！真係唔知係做漏咗表情定係真係咁 Hea，希望之後會 Update 改善返啦。
好，衰野就講完，但係點解我地仲會 Keep 住玩呢？因為動作格鬥遊戲黎講，我覺得劇情故事其實只係佔整隻遊戲 20 – 30%，而《Jump Force》佢出事既地方又大部份集中係故事模式，當你開始進入同人對戰既部份，就發現呢隻遊戲並唔係想像中咁簡單！
全部覺醒技都好有型
《Jump Force》基本動作得幾個，輕、重攻擊、投擲同必殺技，仲有最華麗既覺醒技（順帶一提，全部招式都係按 R2+正方三角圓圈交叉就得，唔洗 Chok）。另外仲有支援攻擊同換人系統，以及快速移動呢類動作。為咗令一般玩家都易入手，基本上呢隻遊戲齋撳正方連打已經有頗華麗拳腳連技，最尾仲可以用「龜波氣功」呢類招式收尾添，非常之易入手！
悟空招牌技能，極之好用，射程遠，起手快，仲可以連招，必入技能
雖然話好易入手，不過呢隻遊戲其實暗藏格鬥遊戲元素係入面，例如最基本既技巧「目押」。（即係照指定節奏輸入指令，講求玩家準確度同節奏感）
頭先有講到齋撳正方連打已經有連續技，不過原來每個角色都有自己既拳腳連技 Loop，例如我自己既自定角色就會用「輕 x 3、輕 x 3、重 x 2」咁去起手，比起普通齋撳正方連技傷害高得多，亦都比較安全。因為齋撳正方連技去到最尾 3hit 既時候會使用瞬間移動追擊，呢個時候敵人只要睇準時機係可以 Counter 到你的，我就試過同人對戰中互相 Counter 三次，好鬼刺激！
用必殺技收尾可以防止對方反擊
除咗有自己鑽研每個角色連技規則呢個趣味之外，部份連招擊中後係可以使用「換人」黎繼續連擊，淨係角色間既組合、換人之後既連招都有排你玩了，都仲未計非常有趣既「支援攻擊」！
《Jump Force》入面，每邊可以選擇三隻角色，按順序自己使用緊既頭像方就係會發動「支援攻擊」或者可以換入既角色。咁點解話「支援攻擊」非常有趣，因為每隻角色都有自己固定既支援技能，例如魔童會跳出黎出「魔貫光殺砲」、幽助就會跳出黎出「靈丸」、路飛就會出「橡膠火拳槍」咁，而「支援攻擊」一般黎講只會分為「射擊系」同埋「近接攻擊」二種。
每個角色都有自己預設支援攻擊，好似 DIO 咁就係二技「將軍」
作為熱血王道漫畫，角色技能當然係有咁華麗得咁華麗，有咁花得咁花啦！然後你就會發現有啲角色係可以利用技能特效去遮掩敵方視角，令對方無法睇清楚你既攻擊到底係直接拳腳攻擊、投擲、定係反技，甚至係儲力破防技，變相加強咗雙方既對戰策略！當然有利亦有弊，因為視線比擋住，有機會對手已經避開咗攻擊，引你埋去比佢打！（支援攻擊同換人都有冷卻時間，無得狂用的）
露琪亞既支援攻擊被外國玩家評為 S 級，不但可以遮擋地方視線，擊中後仲會有充分時間比玩家連招
除咗以上既系統，遊戲入面仲有「快速移動」呢個動作，每次使用都需要用到左下角既 Boost 能量，用晒就要等一段時間先會回復。而「快速移動」一般黎講主要有 2 個用途，一個就係以極快速度接近敵人，另一個用法就係被擊中時消耗所有 Boost 能量逃脫。當大家熟習對戰之後，每次被敵人連招擊中就會好自然咁去做逃脫呢個動作。
不過呢個逃脫動作其實並非萬能，因為其實仲有一個動作叫「反逃脫」，只要睇準敵人用「逃脫」既時機，立即使用「快速移動」，如果成功的話就會變成「反逃脫」動作！呢個時候對方將會硬食你既所有連招，並且會消耗所有 Boost，係短時間內無法再用「逃脫」，絕對係高手向招式！（「反逃脫」無法係拳腳連按中發動，如果你一直都係齋撳流的話係無可能掌握到）
逃脫只係呢隻遊戲最基本動作，掌握「反逃脫」呢個技巧先叫真正識玩呢個遊戲
最後講少少自訂角色，透過不停推進劇情，玩家將會可以買到更多招式同服飾。除咗滿足自己喜好之外，係 Online 對戰使用自訂角色往往會收到奇效，因為對方係完全唔知你有咩招，亦即係話第一回合自己擁有技能上既優勢。而我自己就比較賤，我整咗隻角色同路飛好似樣，但係啲招式就有投技有劍氣又反技，如果對手以為你係路飛的話就會中晒計，好正的。（另外同朋友 Online 對戰仲未加返 Rematch 落去，快啲加返！）
自己愛用角色
係商店會見到無係本作登場角色既服裝，例如 One Piece 艾斯頂帽
當然仲可以好似我咁，整隻假路飛上網對戰呃人
《Jump Force》係系統上做得非常有心思，而係角色設計上亦都唔係亂黎，好充分重現到原作角色既特性。例如我有位朋友好熱愛用幽助，佢好善用「靈丸」快速發動既特性，同時亦擁有霸體技能「靈光彈」，每次都要花心思點樣接近佢，接近之後又要顧及佢用咩技能，無好好思考對策的話就只會落得「捱打」既下場。（順帶一提，每位角色都有自己屬性，例如幽助呢類角色儲氣會快啲，戶愚呂弟攻擊力會高啲）
幽助存心同你打拉打的話，係非常難應付的
斯路瞬發技能亦都非常強勢
仲有「海震」呢種有霸體既技能，亂撳制的話就會受到大傷害
DIO 亂拳打完之後可以換人再連，好爽
戶愚呂弟速度慢，但係攻擊力其高，仲好樣衰添
製作組係唔少地方都有花心思，好似小岡使用完覺醒技變成大岡之後，就會自動退場變成無法使用狀態，符合完作設定
總括黎講，《Jump Force》呢隻遊戲如果純粹買黎想睇故事的話，先自問頂唔頂得順不停重覆既任務，你得先好試。但係如果係買黎看門口，招呼朋友上黎亂打的話，佢的確係會玩得開心的。而如果想用心鑽研的話，佢一定唔會令你失望，我個人黎講直頭又無寄望變成上癮，絕對推薦大家一試！
孟波出奇地勁！佢既支援攻擊簡直煩到嘔電！
《Jump Force》已經推出，對應版本有 PS4 / Xbox One / PC，而感覺上，Xbox One 版 Loading 時間似乎比 PS4 版快，主力攻單人遊玩的話可考慮買 Xbox One 版本。
VJGamer總編，細細個已經蒲機舖，機齡甚深，熱愛電玩文化。