我到而家都覺得《Catherine: Full Body》日版揀喺 2019 年 2 月 14 日情人節呢一日推出係非常有趣嘅決定，雖然你可能會話「同期有好多大作推出」所以根本唔得閒理呢隻遊戲，不過總有朋友同我一樣，對 ALTUS 出品遊戲有種信心、有種情意結，我當時《Kingdom Hearts 3》打到一半，都二話不說轉 Game 玩左《Catherine》先。
如果你唔知道《Catherine》係玩咩，可以參考我地早前嘅報導【按這裡】；如果你有玩過 PS3 版本嘅《Catherine》，我相信你最關心嘅係新角色 Rin 嘅劇情線到底點樣發展。
（2020.07.08 新增內容）
除左 PS4 版，遊戲亦已於 2020 年 7 月 2 日推出繁體中文 Switch 版本！
故事大綱好現實，Vincent，32 歲，有份工，無大事業、無樓無車、無咩大夢想大目標，簡單黎講就係平凡小男人一個，有位拍拖五年、同齡，開始逼婚嘅女朋友 Katherine，之後佢仲要同你講「我有左」，面對呢份壓力，Vincent 遇上金髮妙齡性感美女 Catherine，再遇上天使一樣單純讓人心溫暖嘅 Rin。
表面上，呢個係一個多角戀故事，不過你玩落去，就會知道嘅劇情走向真係好鬼痴線，與其話佢係動作版嘅 AVG，不如話佢係有愛情同恐怖元素嘅超自然力量故事……
不過，遊戲入面對於男女關係、婚姻、同性戀、變性人呢啲題目，相信唔係個個玩家都認同，亦有唔少網友認為《Catherine》係一個非常「男權」嘅遊戲，呢個論點喺歐美 Twitter 以及 Reddit 用戶之間好似仲係 Hot Topic。
係嘅，遊戲中部份觀點，我唔認同，不過打機啫，唔係下下要上綱上線、講政治講陰謀論嘅。
遊戲流程好簡單，可操控場景只限於現實（酒吧）同埋入睡之後嘅惡夢（塔）。喺酒吧入面可以同你嘅一班兄弟吹水，亦需要，無錯，係需要同其他客人進行交流，因為其實呢班客人都係入夢後嘅「惡魔之塔」途中會遇到嘅同伴，如果你想故事完結之時，想同時救哂呢班人拎獎盃嘅話，就一定要同佢地講野。
咁交流還交流，《Catherine》除左要爬塔通關之外，其實仲有好多對話選項，而呢啲選項其實好影響你到底最終會行向邊一個結局、亦會影響到底啲酒鬼朋友生唔生存到；所以對於唔擅長日文嘅朋友，《Catherine》會於 4 月 25 日推出繁體中文版呀！要預購嘅朋友可以馬上行動～。
酒鬼朋友啲問題，好多時其實兩個答案都合理，但係得一個係正確答案…
同埋酒鬼朋友出沒時間／離店時間係有分別，所以定期 Save 留底保平安
題外話：因為聽哂「酒的小知識」可以解獎盃，所以我每次返到酒吧都好樂於比 Vincent 做酒鬼，「飲啦你！」咁樣。不過，如果現實中真係有個朋友晚晚 Happy Hour 飲到醉醺醺，我真係惟有講句保重，十盒卡士蘭都幫你唔到。
另外，畢竟係 ALTUS 出品，所以同社嘅《Persona》元素都不時加插喺遊戲入面，例如你喺酒吧入面可以揀播《Persona》系列嘅 BGM。可以聽返《P4G》嘅「Snow Flakes」我好開心～
喺酒吧入面仲可以切換遊戲難度，難度影響嘅其實係「惡夢之塔」嘅困難度，例如啲石頭變化多啲、下面嘅追手動作會快啲變態啲、石階段落下跌速度亦會加快；如果你一心純粹想睇故事嘅，一開始就玩 Hard 你應該會嬲嬲地，因為真心難玩；我自己初始係 Normal Arranged，都有幾版塔我玩到躁躁地……。
除左故事模式入面嘅「惡夢之塔」之外，遊戲仲有挑戰模式嘅爬塔可以玩，呢個模式入面可以用返《P5》嘅 Joker，遊戲仲好有心咁搵返龍司（宮野真守）、杏（水樹奈奈）等人返黎配呢個特別 Stage 嘅配音（心）
不過呢個模式就無得用道具，無得 Undo，一切純靠玩家技巧，所以……大家加油。
講哂系統方面嘅野，就黎到劇本了。Rin 呢個新角色其實係男仔，相信已經唔係咩新聞了吧？不過無諗過玩埋落去，先知佢嘅真正身份……
為免劇透大家，我只能同大家講，你剛剛開始遊戲，由第一夜去到第六夜時，應該都仲覺得啲劇情發展雖然偶然吊詭，但都仲算講得過去（當然金髮 Catherine 成日神出鬼沒呢一點，都暗示左呢個角色唔正路～LOL）
不過，如果 Vincent 最後揀 Rin，即係唔要正印、亦唔要外遇對象嘅話……喂，我中途轉基啫，我黎 Happy 架咋，點解個劇情會發展到好似《寒蟬嗚泣時》咁架？
遊戲一共有 13（？）個結局，連同 Vincent 在內，每個角色都有 2～3 個結局版本；當然玩呢個遊戲，我就唔係追求個劇本有幾振奮人心，不過，我真係無諗過後期啲劇情發展，真係超現實到好似玩緊 SF 咁，我都已經唔知話佢係獵奇好定創新好，總之我就玩到好有驚喜……或者驚訝，例如 Rin 嘅結婚 End，由第九夜開始我就 Keep 住「 *口*」咁嘅模樣望住個 Mon。
結局點樣發展，就留待各位玩家自己參詳，反正，你可以話佢唔 Make Sense，但係，真係好創新……。
綜觀黎講，推出之前我已經好期待玩《Catherine: Full Body》，而玩完正式版之後我都無乜失望的，趣味度十足，我而家係差酒吧入面部遊戲機未爆機，所以仲未拎到白金。
（2019.04.26 新增內容）
遊戲嘅繁體中文版已於 2019 年 4 月 25 日正式上市，「文字」喺遊戲裡面係相當重要嘅一環，因為你覆短訊時會面對答案選項，而呢啲選項好多時表面意思都近似、只係語感或者語意有微細分別。
中文版《Full Body》嘅翻譯做得算是不錯，雖然我認為部份選項語意可以譯得更傳神……
不過，點解揀 Catherine 語音嘅部份，聲優要變哂做羅馬拼音呀？直接用漢字對玩家黎講應該會易理解啲噃……
最後送上由 SEKAI ON OWARI 主唱嘅遊戲 Image Song「Re:set」片段：
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。