好耐無寫文，一寫又係星矢game。

又星矢game？係呀，咪就係又係星矢game。最近唔少朋友聽到《星矢課金：覺醒》（聖鬥士星矢：覺醒）就快出，都有個疑問，玩唔玩好呢？

「星矢game？伏到嘔喎」

之前幾隻，真係好L伏，一隻得個畫面，抽碎片抽到嘔，系統後來修修補補，可玩性唔多夠。

另一隻，Lag到嘔，所謂群戰完全唔星矢，好快就無人玩。

仲有一隻，Q版喎，如果聖衣神話變Q版你會唔會買？未必囉。

但今次呢隻星矢，真係幾期待，所以一封測我就連金都課埋照玩試一試（玩玩下先發現一開始根本唔使點課）。

極速簡單講講系統，就係回合制，神雕俠侶式羈絆，砌隊上場，回合制可以去到自動加速3，都幾快。

角色分CBAS，S當然係黃金聖鬥士，A有各大小強強化形態（爆衫紫龍）、白銀，而初始星矢係B。角色能力，主要係Lv，第七感開醒覺技（你當係神雕開穴位咁），同埋升技能本身lv。升Lv要經驗水，第七感開穴要醒覺道具，兩樣都係典型刷分方法得來，至於技能，就要食返自己張卡，lv1升2食1張，lv2升lv3要食兩張，所以B、A都有好大生存價值。

戰鬥時，每回合有技能點，例如第一回合有兩格，即係你全Team可以有兩點Mp做嘢，紫龍出昇龍要用兩格，兩格用完，你後面就要全普攻；第二回合總共有四格，第三回合六格等等，換言之，除非你有貴鬼加MP（偷用下回合MP），否則要好好分配MP先得，例如魔鈴可以加血，獨角獸攻擊都勁，但行動順序太後，你要刻意留MP，佢哋先可以好早回合出到招。

系統講完，係時候講下點解要玩？

以我game齡都算玩過晒所有星矢game，如果要玩一隻重視劇情嘅星矢game，呢隻真係有一玩價值﹗除了全語音（辰巳德丸都有），由銀河大會玩到金牛宮，途中都睇咗好幾次動畫。加上好多歌（好似有「聖闘士神話 ～ソルジャー・ドリーム～」唔知有無聽錯），劇情投入度係上面三隻星矢game俾唔到嘅。

此外，場景效果做得唔錯，要有小宇宙嘅位都有，好多對話都充滿回憶。尤其係公開頻有個叫「沙加問道」活動，試到你對星矢有幾熟，例如：

「以下哪個聖鬥士不是在百伯利亞修行的。」

「死神的名字是什麼？」

「以下聖鬥士穿過哪一件黃金聖衣？」

仲有剪影估人，你真係諗唔到，手遊星矢可以有咁多內容。

系戰鬥系統組合暫時都OK，筆者推薦白羊夾金牛/星矢夾紫龍，因為出0MP普攻都有合作技，當然一開始獨角獸、魔鈴都係超好用神角，反而太早抽到教皇果啲無咩用。

山羊同金牛都勁，單體真係絕騎出塵。

緊記緊記，好多角一定要醒覺咗第七感果招先勁，例如卡妙同穆先生，都要醒覺先會有兩格群攻。

不過講到尾，隻game都有兩樣嘢要留意，第一就係隻game超大食，解像度亦唔算太高（我啲cap圖較低咗），第二樣就係入面有好多關都有啲懶係俾你9行嘅空間，但9行空間，其實即係無空間，又食你時間又食game位，又唔係FFBE果啲要行迷宮，呢個設計認真有問題。

另外，林志玲做雅典拿真係唔靚囉，呢個年代，至少都搵袁澧林啦，搵姜濤做星矢。

咁結論，正式出好唔好玩呢？咁要睇你有幾大覺悟，跳落去通往地獄嘅果個深坑。

（課金方面，封測送好多石係真，但都係要睇開服後點搞）