由 Ubisoft 製作及發行嘅戰略動作遊戲《Skull And Bones》喺 2017 年 E3 上面公開大波資訊，玩家飾演海盜船船長展開海上歷險，遊戲原定 2018 年秋冬發行，後來延期至今年。

遊戲正式發售日尚未公開，但係根據外媒《The Hollywood Reporter》嘅獨家報導，原來 Ubisoft 已率先決定將《Skull And Bones》改拍為真人電視劇，以 1700 年代為背景，將以女海盜英勇事跡作為劇本；即係咁，Game 未出先拍劇呢一種做法，或者證明 Ubisoft 對呢個 IP 充滿信心噃！

Ubisoft 作品改篇為影視作品當然唔係第一次，例如 2016 年嘅電影《Assassin’s Creed 刺客教條》，不過呢套大熱遊戲改篇為電影後嘅評價就麻麻地，今次 Game 未出就拍劇唔知出黎效果又會點呢？市面上一直不乏海盜題材嘅影視作品，而目前呢套電視劇所有台前幕後嘅人選都未公佈，更加未有片花睇，所以惟有抱觀望態度。

其實於去年 E3 Ubisoft 展出嘅《Skull And Bones》影片已經係一條充滿電影既視感嘅 Trailer，不過相比起電視劇，作為 Gamer 我始終都係比較關心遊戲幾時可以正式推出。在座各位又會唔會對呢套電視劇感到興趣呢？

遊戲預計 2019 年登錄 PS4、XBox 以及 PC 平台，至於電視劇由於未有片花，大家一齊睇住遊戲 Trailer 先：