《伊蘇：塞爾塞塔的樹海 改》即將於 2019 年 5 月 16 日上架，遊戲以 2012 年 PSV 嘅重製版本作為藍本，重新進行高清化再度推出市場。

日系 RPG 開發大社 Falcom 旗下嘅《軌跡》系列，隨住《閃之軌跡 4》完結，故事暫時告一段落，雖然去年訪問近藤社長時知道《軌跡》故事離真正完結仲有好長嘅路，又利申《閃 4》感想文一直未得閒打（因為深愛所以唔知點落筆 orz），不過，近藤社長當時亦表示過公司黎緊會專注返喺公司另一龍頭 IP《伊蘇》上面。

話甫說完，《伊蘇 9》宣佈將於今年內推出，唔知在座有幾多朋友有玩過《伊蘇 8》，我個人就對遊戲無論係劇本安排抑或系統都有極高評價，不過近藤社長就話仲有好多新元素想加入《伊蘇》系列裡面，所以《伊蘇 9》非常值得一眾玩家期待！

雖然《伊蘇》系列好似歷史悠久，如果中途先入坑會唔會跟唔到故事？答案係唔會的，因為每一集《伊蘇》喺劇本上都盡量獨立成章，當然喺世界觀或者人物關係上物偶有與前作有所牽連，但係即使中途先開始玩《伊蘇》，相信你都會感受到遊戲嘅樂趣。

官方形容《伊蘇：塞爾塞塔的樹海》係《伊蘇 8 ＆ 9》嘅原點，如果當時無玩過遊戲或者想重溫經典嘅朋友，5 月一齊同紅髮安德魯再次開後宮一齊歷險吧！