將於 3 月 8 日上架嘅《Devil May Cry 5》，喺 2 月 7 日首次喺 PS4 上面推出試玩版 Demo。呢個試玩版同較早時份於 XBox 平台推出嘅 Demo 劇情以及份量基本上一樣，只不過今次嘅版本就新增左三樣野，包括係比玩家使用 Save 機能（進度可繼承到正式版遊戲）、玩家可以入到 Nico 店舖購買技能、以及比玩家試用多一種 Devil Breaker。

《DMC5》作為一個喺全球都擁有大量 Fans 嘅遊戲系列，當然有佢嘅魅力喺度，加上今集操作角色有得用返但丁，更加係令好多玩家極為期待。

有唔少玩家就反映話《DMC》近幾代嘅劇本故事唔多吸引，咁對我黎講，《DMC》一向都係以炫麗攻擊畫面表現見稱嘅動作型遊戲，所以，我又唔會期待佢嘅劇本會出現啲令我感到發人深省或者痛哭流涕嘅情節出現……攻擊動作要流暢、型格、炫麗，點樣連技連出高 Rank，呢啲先係《DMC》嘅主要遊玩重心。

因此，著重遊戲劇本要有深度嘅朋友，《DMC 5》未必會適合你口味；本身係 Fans 嘅朋友自然更加唔駛多講；但係如果你係慕名而來，無玩過以前嘅《DMC》嘅話，我諗今次呢個試玩版係一個非常好嘅機會，比你去感受自己到底鍾唔鍾意呢個遊戲。

今次試玩嘅Demo 篇幅其實並唔算多，操控角色只有尼祿；以破滅都市作為遊戲背景嘅畫面係靚嘅，不過 Demo 內容短，只係比玩家行到三四個街口、試左幾個跳躍連技動作，就要你去打 Boss。

咁試玩版難度唔知係咪 Set 得較為簡單、又或者可能試玩版想比非 Hard Core 玩家都感受到遊戲樂趣啦，Boss 嘅動作真係千篇一律到我有黑人問號；而四種 Devil Breaker 假設只係使用一般圓鍵攻擊、而唔係儲力攻擊嘅話，我亦未有足夠機會去感受四種 Breaker 喺傷害值上面造成嘅分別。

當然，試玩版黎啫，難度可以較低，動作亦都只係比玩家嘗鮮，呢啲想法我當然理解；不過呢個 Demo 嘅動作變化真係唔多，相信要等正式版出黎之後，買多幾個技能，先會有更多唔同嘅演變。以目前試玩版以及所有官方遊玩片段黎講，我相信《DMC 5》會交出一張不過不失嘅成績單；但係會唔會好似《DMC 3》咁創下經典傳奇，我又覺得《DMC 5》似乎都幾難衝出呢個傳統關口……

另外，我最想試玩嘅其實係新角色 V，因為 V 應該係《DMC 5》入面最創新嘅元素黎 LOL 好可惜未有咁嘅機會。

《DMC 5》將於 2019 年 3 月 8 日於 PS4、XBox 以及 PC 平台上面推出。

題外話，假如你玩日文版的話，同屬 CAPCOM 公司產品的《DMC 5》以及《Biohazard RE:2》裡面嘅但丁以及 Leon，其實係由同一位聲優大手森川智之配音架，對聲優有興趣嘅朋友可以留意下（笑）