備受玩家期待嘅 EA 年代大作《Anthem》早前為先行預購左遊戲嘅玩家推出為期三日嘅 VIP 試玩活動，國內外唔少朋友喺活動開始當日，準時坐定定準備開 Game。

不過 Server 不似預期，儘管大家滿腔期待，但係極大部份玩家面對嘅問題，就係入唔到 Game 以及連唔到 Server；就算成功入到 Game 嘅，亦有好多人 Loading Load 到 95％ 就無法完成連線，結果真係成功入到 Game 玩到試玩版嘅朋友並唔多！

如果在座有朋友順利連到線玩到遊戲，恭喜你，2019 年你似乎運氣不錯。

明明係 VIP 試玩，結果令到好多朋友失望，《Anthem》Live Service 大佬 Chad Robertson 就拿拿聲出黎出文道歉，既話團隊已經聽到大家意見，亦知道問題所在，全部人已經 24 小時不斷修正遊戲以及提昇 Server 服務，詳細如下：

Chad Robertson 亦都話「好希望喺 VIP 試玩活動感到唔滿意嘅玩家，可以比多次機會《Anthem》」，無錯，因為 2 月 2 日（今個星期六）就係遊戲預定開放比公眾試玩嘅日子，到時入 Game 嘅用戶會比 VIP 活動時更多，到底呢幾日係咪夠時間比團隊做好 Upgrade 呢？

不過，我地亦唔想嘩眾取寵或者淨係報悲不報喜，喺 VIP 活動入面，成功試玩到《Anthem》嘅玩家遊玩時數，總計為 900 萬小時，到底有幾多玩家同時在線先會達到呢個數字呢？而我又咁諗，一隻同時要允許咁多在線玩家嘅遊戲，喺測試初期，個 Server 又真係預左佢會有問題嘅……所以黎緊嘅公開試玩，我都仲係會想試多次的。

一齊黎睇下玩家上載片段：

It really adds to the experience when things get crazy!!!! pic.twitter.com/CSrcQAygSy

— Jeffry Simmons (@JHymons) January 30, 2019

比較好笑嘅係，遊戲入面有一種名為 Grabbit 嘅生物，係《Anthem》世界入面屬於最低層嘅動物，基本上唔會對玩家做成影響，不過喺 3 日 VIP 活動入面，呢隻 Grabbit 比玩家殺死嘅數量，粗略估計為 200 萬隻，唔知到正式開 Game 時絕左種未（喂）

Grabbit

《Anthem》公開試玩為 2 月 2 日～4 日，而正式推出日為 2 月 22 日，對應平台為 PS4、XBox 以及 PC。