我地係台北電玩展有幸試到今年年頭大作《Far Cry New Dawn》，有玩過上集既朋友相信都好期待今集。作為上集既延續，今集玩法上會有咩變動，靈魂人物教父又會以咩方式登場，我諗好多人都好想知道，而我地係今次試玩就玩到重遇教父既神祕任務！

今集地圖仍然係希望郡，不過係核爆十七年後，已經變得面目全非。遊戲系統基本上無乜改變，舊有玩家應該極速上手。而傭兵系統係試玩部份一開始就有得用，而且仲一如既往地強勁，大家可以放心啦。今集新武器「鋸片槍」可以話係非常之過癮亦有少許 OP，當超過一位敵人時，刀片擊中敵人後會再反彈去另一敵人度，造成多重傷害效果，缺點係每次只有一粒子彈而且上彈速度奇慢，不過正路黎講都會係今集常備武器之一。

新武器「鋸片槍」面對多過一位敵人時，威力極大

《Far Cry New Dawn》加入類似《Far Cry Primal》既據點系統，不但強化相關功能而且更系統化。當完成初期任務 「拯救湯姆⋅瑞斗」（好似有個員工話呢個先係果隻 NPC 真名）之後，我地會黎到倖存者既基地「繁榮鎮」，係「繁榮鎮」入面會有各種各樣既設施，玩家可以透過升級「繁榮鎮」黎解鎖各種設施，要進行升級動作就需要先拯救唔同數量既專家。另外要升級個別設施的話就要有收集對應既資源，例如要升級「車庫」的話就要收集 100 個「乙醇」，而「乙醇」則可以透過解放哨站得到，升級後將會解鎖更多可製作車輛種類。除咗「車庫」外，仲會有「工作檯」、「訓練營」、「炸藥實驗室」、「醫務室」、「療癒花園」、「製圖」、「遠征」等八種設施，呢樣就等正式推出之後大家慢慢摸索啦。

要升級基地，就要先救人

除咗基地等級之外，基地入面每種設施都要獨立升級

今集要收集素材似乎都幾多種類

試玩尾段我地去到上集最終決戰小島，亦都係「聖父」既領土。一上岸已經瀰漫住濃霧，亦都可能係上集啲毒氣。步行一段路之後會觸發劇情，亦都見到「聖父」既影像出現係眼前。之後根據「聖父」既指引將會進入解謎階段，當完成後玩家仲會得到「預言書」，本書到底有乜用，「聖父」係今集又扮演緊咩角色？呢啲留返比大家推出時慢慢發掘啦，要知道劇透會死全家架……

《Far Cry New Dawn》將於 2019 年 2 月 15 日上市，對應平台 PS4 / Xbox One / PC。