2019 年備受關注嘅喪屍大作《Days Gone》，舊年只係喺東京遊戲展同 E3 有得玩，香港玩家一直無份；不過，今次台灣遊戲展 2019 終於設有遊戲試玩攤位，我哋梗係要試吓啦！一齊黎同大家睇下現埸圖片先：

遊戲嘅試玩版分為兩個模式，一個係簡單嘅體驗模式，另外一個係困難嘅生存模式。作為自虐編輯部，我哋梗係選擇困難模式啦！

先講一講基本操作，同大部份嘅射擊遊戲一樣，L2 係瞄準，R2 係射擊 / 確定；而 R1 + 方向就係碌地，L3 就係跑（不過呢兩個動作都需要扣體力）；另外仲有武器選舉環及武器製作，同時亦都有類似《刺客教條》嘅鷹眼系統，使用後會標示場上可使用嘅場地道具，例如係油桶、爆炸物、運油車等等。

困難模式下，玩家需要殲滅全數 300 隻喪屍……聽落好似好簡單，但係玩落就完全唔係嗰回事！

雖然喪屍一槍就可以擊倒，但係由於數量太密集，加上運動能力極高，而玩家亦有體力限制嘅關係，所以就算你 keep 住跑，班喪屍都仲係同你距離得好近，近嘅程度你就當好似有大陸人喺你後面排隊嘅距離咁上下啦～

另外一樣同傳統喪屍遊戲分別好大嘅地方，就係喪屍嘅攻擊，並唔係普通咬你一下、又或者係抓你一下咁，而係會捉住你的，一但俾佢哋捉住的話，就算滿血都會即死；所以係呢個模式下，玩家不但要一路走一路攻擊後面嘅喪屍，仲要諗定點兜圈，唔係就會卡死自己。

試玩條隊排到打哂蛇餅，所以我地初體驗就係以上嘅感想；不過今次試玩完之後，令我對遊戲重新充滿期待，有興趣嘅玩家記得留意啦。

《Days Gone》將於 4 月 26 日推出，PS4 獨佔。