《隻狼：暗影雙死》採用一貫敘事風格從零碎情報拼湊故事面貌

FromSoftware 既《Dark Souls》系列、《Bloodborne》除咗遊戲難度極具挑戰性外，遊戲故事獨特既敘事風格亦都深受玩家所喜愛。而即將推出既新作《隻狼：暗影雙死》（Sekiro: Shadows Die Twice）故事部份到底用咩手法去描寫就一直都未有相當資訊，不過日前外媒 Game Informer 佢地既獨家訪問就終於揭露呢方面既資訊，而且相信一定唔會令各位 Fans 失望！

過往不論係《Dark Souls》系列、定係《Bloodborne》，二者都唔會話有一大堆字幕，然後久唔久就一堆 CG 話你聽故事係點。相反佢地都係透過簡單既開場片、再透過遊戲中各角色以及物品當中既描述，綜合各種模糊線索後再描繪出玩家心目中既故事，所以大家經常會見到啲《Dark Soul》故事解說，但係每個故事都不盡相同，呢點亦係遊戲魅力所在。

但係二者既做法都係有一個遊戲世界，玩家再係呢個世界入面探索遊戲世界入面既歷史，了解當中既人物，從而投入故事，而並非單一角色既故事，玩家只係成個遊戲龐大故事既一部份。但係黎到《隻狼：暗影雙死》，遊戲唔會再有之前既捏人及升級系統，玩家將會扮演主角「狼」，玩家將會經歷「狼」既故事、接觸建構故事既人物角色。例如玩家會接觸到「梟（The Owl）」，佢係養大

「狼」既人，遊戲總監宮崎英高甚至話佢並唔係大家常見既一般 NPC 角色，而係擔任主角世界影響深遠既關鍵中心人物，大約係養父既角色。

《隻狼：暗影雙死》時代背景係戰國時代，因為係江戶時期日本啱啱先由混亂中重生，而且感覺上同《Dark Soul》既風格類近，就好比係日本「中世紀」，開發團隊亦都可以更好咁利用當中偏中世紀元素既內容。

遊戲故事講述「狼」以及佢所保護既皇子。開始前既動畫，「狼」同皇子被葦名將軍所率領既敵軍攻擊，而係對決中「狼」被斬去左手落敗，皇子就當然比人捉埋啦。當「狼」再次醒黎既時候，已經被裝上「忍義手」，而故事就此展開。

根據 FromSoftware 市場及傳訊經理北尾泰大既解說，玩家係遊戲過程中會同皇子有數次會面，而隨住遊戲演進玩家將會見到人物關系既發展。另外係遊戲初期，皇子會同玩家共同行動，但係又有別於傳統既護衛任務，而呢個情況只會出現一次。

Game Informer 仲試玩咗《隻狼：暗影雙死》新遊戲 Demo，而今次體驗地區叫做「Hirata Estates」，呢部分內容將會以回憶方式出現。而係呢個 Demo 入面，玩家需要同「梟」既故交「蝶」交手。當然係現階段仲未知道「蝶」同主角係咩關係，係回憶入面到底係同主角演練忍術，又抑或係生死對決，暫時就中未知道。不過宮崎英高亦都補充話遊戲唔會有大量「回憶」既篇幅，遊戲中只會有一段一次性既回憶劇情，令到玩家從中收集一小部份既劇情碎片，當然要知道事件既全貌仍然要好似以前咁靠自己拼湊出黎。