由加拿大遊戲工作室 Other Ocean Interactive 所開發嘅 Co-op 求生逃離遊戲《Project Winter》於 2019 年 2 月 7 日開始早期販售，售價為 19.99 美元（2021.02.10 更新：已登錄 Xbox 平台及對應 Xbox Game Pass）

《Project Winter》係一隻八人線上合力遊戲，玩家被困於冰天雪地，必須喺限時入面合力逃出生天；而逃生過程入面，玩家亦都需要確保食糧及物資令自己可以生存落去，同時遊戲裡面亦會遇上敵人（例如熊！）嘅攻擊，加上天氣會有如暴風雪等不同程度變化，所以淨係「求生」呢個部份已經非常有挑戰性。

逃命辦法有幾種，但主要辦法係要玩家去到電波塔位置進行修復，先可以聯絡外界尋求救援。

不過，如題目所講，呢個並唔係一個單純嘅求生遊戲，因為八位玩家入面，有一位喺遊戲開始時，就會被系統任命為「背叛者」，而背叛者嘅最終任務，就係要其他玩家無法完成逃難……簡單黎講就係整死其他人。

之不過，背叛者亦都唔易做，因為你刻意表現得太唔合作時，一旦其他組員對你疑心生暗鬼，對你先下手為強，你就輸了；所以平時打機特別叻、或者打 Co-op 做開大佬有領導才能嘅玩家，你玩呢個遊戲應該特別有挑戰性，因為你一扮豬隊友其他人就好易悉穿你！

為左加強玩家之間「互相懷疑」嘅傷害友誼玩法，遊戲內置嘅 Voice Chat 亦都有特別設定，例如你可以 Group Chat，但你亦可以私底下同特定成員進行交流。如果你同朋友一齊喺 Game 入面，身為背叛者嘅你，係可以夾埋佢一齊做低其他玩家的（至於最後你殺唔殺埋自己個 Friend 就……）；呢個出賣友誼同信任嘅玩法，都係遊戲一大樂趣。

遊戲對應 Steam 以及 Xbox 平台，期間限定對應 XBox Game Pass！

最後為大家送上遊戲 Trailer：