上個星期公佈左 2018 年最後一輪嘅 LEGO Ideas 入選名單，5 個入選作品當中，我自己就梗係想 Playable Lego Piano 可以成功量產啦！我得知製作者 Donny 咁啱會喺香港留兩日，咁當然膽粗粗約佢出嚟食個飯，傾下 LEGO 經，又八卦下「成為首個講廣東話華人成功達陣成為 10K Club （一萬票得主）」嘅佢依家會唔會又興奮又緊張。

「開心！不過前期喺未成功達標趕到一月呢期，差少少票數嘅情況係有啲緊張」對手唔多嘅情況下，評審反而可能睇得更著緊，但同時大家都記得出現過一個情況係所有入選者都落空，不過聽得出 Donny 都到達 10K 之後就平常心看待。

「就算今次可能唔成功，下一個作品我都會放返上去 LEGO Ideas 上面」有唔少創作者會透過不同渠道、不同方式去將自己作品或者製作書出售獲利，不過 Donny 就似乎唔係咁睇「無論出面其他嘅品牌或者合作商再好都唔及 LEGO。因為當自己個名喺 LEGO 產品上面出現，呢個係一個好大嘅榮耀」

雖然令大家認識 Donny 一定係佢首次投稿去 LEGO Ideas 嘅 Playable Lego Piano，不過喺之前係乜野動力真正驅使佢開始 Playable Lego Piano 嘅第一步？係對鋼琴嘅愛？定係對學生教育嘅責任？以上兩樣當然都係，不過原來仲有一個好大嘅動力喺背後一直支持 Donny，同時喺製作嘅過程中一齊去並肩而行嘅就係同樣教琴嘅 Donny 太太。

原來喺 Playable Lego Piano 都仲只係概念嘅時候，Donny 係將佢自己喺澳洲嘅居所用 LEGO 砌一個 Minifigure 比例嘅版本，仲要放返喺自己屋企入面，整到好似有個 LEGO 嘅 Mini-Me 同自己一齊生活咁。

唔只外觀，連裝修、擺設都一樣！(佢話佢真係放左一條街嘅 Modular Building 喺琴上面 XD)

用左三個月，夾夾埋埋超過八千幾塊嘅組件砌成，唔係為咩目的，只係想用自己雙手砌出一個「安樂窩」。不過呢三個月時間主要唔係用晒嚟砌，而係等訂左嘅件喺世界各地寄到自己手上，而點樣消磨等嘅時間？Donny 決定爆 Set 去砌下啲官方產品。而當時正正就係 21311 LEGO Ideas Voltron 百獸王發售期間，Donny 一路砌嘅時候同時同佢太太講解 21311 LEGO Ideas Voltron 點嚟，又講解埋 LEGO Ideas 嘅運作方式。佢太太了解晒之後就問左佢一句

「點解你自己唔製作一個？」

就係呢一句，就係呢一下嘅動力，加上近年新組件喺拼砌上帶嚟多左新嘅方法同技巧，就令到 Donny 下定決心，要完成 Playable Lego Piano 呢個目標！

事情當然未完，其實 Donny 嘅太太同佢一樣都係鋼琴教師，喺 Donny 製作 Playable Lego Piano 嘅時候其實佢同不斷同太太分享自己每一日嘅進度。而佢太太又當然”挑戰”下佢「琴櫈有冇得調高低架？」「踏板有冇反應架？」咁喺 Donny 對鋼琴嘅熟悉之下當然亦都可以”還擊”「梗係搞掂啦！」直到太太問到一個連 Donny 喺製作初期都唔醒起嘅小細節！

「個琴蓋識唔識緩降架？ >:D 」

原來當時 Donny 都醒唔起呢個細節，而呢個令到大家覺得完滿嘅結構全賴太太嘅一句說話。

當全副心機放晒喺製作 Playable Lego Piano 嘅時候， Donny 亦感激太太幫佢去處理日常嘅事務。 LEGO 創作圈子當中唔少情侶或者夫妻嘅組合，但一個本身並非愛好者而對方又肯同你「樂在其中」嘅真係萬中無一。

我諗每一個 LEGO 男玩家，都只想遇到一個肯陪你蒲 In’s Point嘅女子

Playable Lego Piano 己經喺評審當中，今年嘅夏季就會公佈結果，可唔可以量產我諗都只係得官方先有答案。依家除左祝福之外就只有祝福，大家耐心祈求 Playable Lego Piano 嘅量產消息啦！