【遊戲評測】顛覆固有遊戲玩法《The MISSING J.J.》被忽視的優秀作品

之前我地都有介紹過，全名叫《The MISSING: J.J. Macfield and the Island of Memories》（失落的 JJ 與追憶之島）呢隻遊戲。本作由知名遊戲創作者 SWERY（末弘秀孝）主導製作，屬動作解謎遊戲。而呢個遊戲最特別既地方就在於玩家要破解謎題，自殘永遠係第一步，咁到底成隻遊戲具體係點？又有幾優秀呢？

要講呢隻遊戲點玩之前，一定要講下個故事背景，遊戲故事講述主角 J.J. 為咗搵返失蹤既好友 Emily，而黎到遊戲舞台「追憶島」。係呢座疑似受到咀咒既島上面，無論受到咩傷害，就算比火燒、受到重傷、肢解到得返個頭都唔會死，不過仍然感受到痛楚。而玩家就要係一直邊受到痛苦折磨既情況下，繼續前進尋找好友。

由於玩家就算得返個頭都唔會死（不過如果連個頭都爛埋就會 GG），所以解謎既方式都係先自殘，再利用各種特性黎破解謎題。好似下面呢 Part 咁，玩家需要越過前面既罅隙前進，但係當接近時腳下既木板就會向下跌，又由於罅隙上下都有尖刺關係，導致無法攀爬。

一行過去塊木板就會跌低

咁我地要過呢 Part 就需要先自殘令到自己斷晒四肢，換言之即係令自身重量變輕。然後再用口咬住自己既斷肢，Fing 過去木板既尾部，當重量得到平衡之後，經過時木板就唔會再下跌了。

掉晒啲手手腳腳去木板尾端

再爬去另一邊

因為自身重量減輕，加上木板尾端有殘肢，所以木板唔再向下跌

除非連個頭都爛埋，否則只要長按三角鍵就可以生返啲手手腳腳出黎

當然呢個只係最基本既玩法，例如之後玩家會去到一個極之漆黑既地方，咁可以點做呢？答案就係：自焚。利用燃燒自身既火光，就可以照亮道路前進，當然仲會伴隨住因痛楚而產生既叫聲，非常變態。

自焚除咗有火光照明呢個設定之外，仲有個幾有趣既設定。當玩家自焚經過一段時間之後，骨頭會燒到好脆，導致承受衝擊力變低，亦即係話跳遠啲或者跳低啲都會斷手斷腳，需要注意一下。

自焚就可以睇到周圍既地形

雖然遊戲充斥住大量自殘畫面，但係畫面並無血腥感。因為製作團隊用咗一個非常特別既畫面表達方式。遊戲中玩家無受傷時，畫面色彩表現非常艷麗；但係當角色受傷後，角色會變為剪影形式表達，就算因為高處掉下甩咗個頭，玩家都唔會好仔細咁見到傷處，只會用剪影表達。同時畫面色彩會變淡，當受既傷越嚴重，顏色甚至會變為黑白，即使怕血腥既朋友相信都可以玩到。

受最重傷(即係得返個頭)，畫面會以黑白配以少少血表現

高處掉落後，頸部折斷，不過用剪影形式表達其實都無乜野

除咗遊戲玩法特別之外，遊戲內既謎題亦都有返咁上下質素，當然個人認為難度可以再調高，不過絕對唔會話簡單到諗都唔洗諗既地步，而且一般玩家隨時有卡關既可能添。

當然解謎類遊戲甚少有二週目元素，但係本作都加入咗「密技」一欄，爆機後會解鎖各種狀態設定，方便玩家收集未完成既物品，都算係貼心既設計。

爆機前「密技」一欄只係比你換下衫咁

爆機後就可以自由設定各種狀態

Art Work 極靚

最後順便講埋遊戲講故事既方式，製作團隊並無冗長既字幕式解說，而係採用一種比較軟性既方式去講故事。遊戲中玩家會透過自己部手提電話得到各種資訊，有黎自主角身邊朋友既短訊，隨劇情推進會陸續收到相關既訊息，從而得知主角 JJ 身邊既人與事。另外偶然會收到黎自 Emily 既電話，每次既內容都非常詭異，會令人更想快啲推劇情，去了解到底真相係乜。