相信唔少朋友近日都已經下載咗《Biohazard RE:2》嘅 1-Shot 30 分鐘 Demo 試玩版（唔知咩事嘅朋友可以參考返【呢一度】；有幾多玩家已經爆左機？又有無朋友用哂自己香港日本美國 PSN Account 下載三次確保自己玩得完？

Speed Run 遊戲係部份玩家打機時鍾意做嘅個人挑戰，不過無諗過呢個 30 分鐘嘅 Demo 都有人挑戰 Speed Run！

呢個試玩版裡面，玩家可以無限 Continue，一次 Game Over 之後就可以調低難度再挑戰，以玩家去到目的地為之「通關」。Demo 以遊戲序章部份為主線，玩家負責操控 Leon 探索 Raccoon City 警察局，無論玩家通關與否，時間一到 30 分鐘就會自動停止遊玩。

其實有玩過嘅朋友就會知道呢個 Demo 可以探索嘅部份唔多，就算你左行右企，基本上都可以無痛於 30 分鐘內通關；不過外國網友 jaypreemo 就決定增加難度玩 Speed Run，最後成績係 2 分 52 秒就通關了，除左「痴線」就只好講個服字！

咁當然佢唔係第一次就玩 Speed Run，呢位朋友玩嘅係 PC 版，咁佢用唔同 Account 分別下載左超過一個 Demo，知道條路點行、幾時有怪之後，先正式計時。Demo 推出第一日，佢已經達到 3 分鐘嘅紀錄；去到 1 月 15 日，佢成功將事件縮至 2 分 52 秒……到底佢有幾得閒……

去到呢度就過關

由片段中可見，玩家之所以可以咁快完成 Speed Run，首先將所有動畫片段都 Skip 左，亦都只會拾取遊戲中嘅 Key Item（例如手槍）；而由警察局東部開始出現嘅喪屍雜魚，jaypreemo 亦都選擇兜路行唔理；如果有無法躲避嘅敵人，玩家就行到最近距離直接爆頭解決。

喺一路基本上 Non Stop 向前行嘅玩法之下，佢嘅成績如下：

睇到呢度，我終於明點解官方推出 Demo 時提到「早玩完嘅玩家可以玩多幾次」，因為 30 分鐘其實真係的確夠你玩超過一次（笑）有興趣睇佢 Speed Run 片嘅朋友，請參考呢度：

《Biohazard RE:2》將於 2019 年 1 月 25 日正式推出，平台為 PS4、XBox 以及 PC。

延伸閱讀：
【把握機會】你可唔可以完成任務？《Biohazard RE: 2》30 分鐘限時 Demo 1 月 11 日登場