Bungie 剛剛宣佈同 Activision Blizzard 正式終止合作關係！兩間公司於 2010 年簽訂 10 年合作協議，黎到 2019 年嘅今日宣佈拆夥，雖然官方講法就話大家係和平解除戰略關係，不過 Activision Blizzard 近來動盪不斷，先係 CFO Spencer Neumann 離開公司轉投 Netflix，之後另一位 CFO Amrita Ahuja 亦都轉職名為 Square 嘅手機支付平台公司，所以當被視為 Activision Blizzard 其中一個主要收入來源嘅 Bungie（《Destiny》遊戲系列）唔再屬於 Activision Blizzard 嘅消息公佈之後，A 社股價急挫……

其實早前 Activision 股東大會出哂聲氣話「《Destiny 2》DLC《Forsaken》雖然好好賣，但係依然唔達公司預期」嘅時候，唔少人都覺得呢兩間公司嘅合作似乎有暗湧，不過正式拆夥嘅消息發表之後，業界都難掩驚訝之意！

當然，相比起股價，作為玩家最關心嘅自然係遊戲《Destiny》系列黎緊發展會點。Bungie 就話自己會接手返《Destiny》往後嘅所有營運推廣方面事務，而 Plan 左嘅更新以及其他發展藍圖亦都會按序進行，「唔會有任何影響」咁話！

好多人就預計《Destiny 3》將會於 2020 年推出，或者 Bungie 係想自己一手一腳處理返遊戲事務，所以有此決定都唔出奇；而 Activision 亦可以專心返《Call of Duty》系列發展，其實話唔定咁樣仲兩全其美咁話。

不過 Bungie 其實亦都動靜多多，早前就公佈公司接收左網易（NetEase）一億美元基金作為新遊戲系列發展之用，所以 Bungie 黎緊嘅發展亦都係我地好關注嘅部份：想打入手遊市場，定係想另覓合作拍檔更想一層樓呢？