【最強合作】顛覆你對主題餐廳嘅印象《陰陽師》兩週年期間限定店・有樣有質素極好味

相信好多朋友都會去過唔同作品嘅主題 Cafe，當中無論係油麻地定係荃灣（大家都知我講邊一間），食物質素就……睇彩數啦，面對住百幾兩百蚊一個主題餐，所有 Fans 都好心知肚明，呢筆錢，其實係用黎食環境佈置的。好彩嘅，你畀百幾蚊會有熱辣辣炒飯食；唔好彩嘅，你會食到凍冰冰嘅無味飯團，再加一杯奇怪糖漿開出黎嘅化學劑合成飲料。

呢啲，係好多人對於「動漫遊戲主題餐廳」嘅印象，因為咁多年黎都係咁，所以大家都抱住「硬食」「唔緊要啦一次半次」嘅心態，為左享受一個「比心愛作品及角色包圍」嘅環境，就算餐飯好頹，你都係會去；為左儲齊啲杯墊，你都係會去。

所以，當我地接到邀請，話《陰陽師》話咁快又兩週年，會喺中環蘭桂芳搞主題餐廳時，我嘅反應係「Sorry pardon 你講多次？」

中環？

蘭桂芳？

遊戲做主題嘅期間限定店？

「得唔得架？唔係搞開 ACG 野嘅地方學人搞主題餐廳……」類似嘅問題喺編輯之間此起彼落，而我只係超級無賴咁講左一句，「去完唔得嘅咪最多唔寫報導。」

無錯，年中我地其實收好多各式各樣邀請，去玩，去食，去試野；但唔係你請左我，我就一定會報，唔係話報左就好多人睇，而係基於一個 Media 嘅最基本原則：喂呀件事唔好嘅，我點好意思 Share 比班讀者呀？

然後，我拎住相機，宅女久違無出過蘭桂芳，戰戰競競咁，去到主題餐廳嘅現場。

電梯打開，迎接我嘅，係《陰陽師》一開 Game 就會聽到嘅 BGM。然後我抬頭一望，左看，右睇，下意識地拎起相機不斷捕捉各個場景同佈置，喺呢一刻，我不禁笑了。

呢種佈置，呢種陳設，Fans 黎到，一定會笑著滿足地離去。

仿照遊戲風格，全個場都滿佈日式小燈籠；帶點昏黃的燈光，營造返遊戲中幽異嘅氛圍

本來半開放式餐廳的設計加上大量遊戲印板

我諗好多 Fans 見到呢面牆會好開心，因為呢度展示咗主題餐廳絕對不能少嘅作品原畫；佢仲要唔係一張紙咁 print 出黎，而係好似你去日本 Animate 咁，每層樓梯咪有時會 Display 原畫嘅？呢度嘅畫完完全全就係嗰種厚身加工材質，對於 Fans 黎講，呢啲位就係心思呀。

黎過嘅朋友可以抽 SSR……唔係，我意思係留低你嘅足跡

作為一間主題餐廳，最關鍵嘅佈置，就係人型角色立牌，以及背景塊 Backdrop 整得好唔好。因為任何作品嘅 Fans，黎得主題餐廳就一定會影相，咁影相一定要件事靚、要自己比角色大包圍咁先開心。

放心，呢啲基本功夫，呢度都交足功課，當然無可能全部《陰陽師》角色出哂黎，但係見到晴明同博雅兩個企埋一齊嘅靚靚畫面，對於 Fans 黎講或者已足夠你消耗幾十下相機快門。

某編輯實測現場攝影燈光效果如下（利申張「食極唔肥」揮春好似黎食飯就會送）：

呢幾張都係來場會送嘅周邊

再睇埋上面兩張圖嘅角落小佈置，呢間位於中環蘭桂芳嘅《陰陽師》兩週年主題餐廳，喺外觀上面是達標了，會令 Fans 收貨了。但係，你可能會話「呢啲人地荃灣嗰間都有啦」，無錯，因為佈置只係基本，我問你，問心，有無邊次去主題餐廳，你係真心覺得由頭到尾都好好食？

我答先：基本上好多時，食到入口係正常，但一定未至於「好食」。我已經唔係淨係用香港黎比，我用埋去台北 Animate、用埋去日本 Gundam Cafe 黎比，好似聽落公道啲，但係……

好食嘅主題餐廳，今次，我真係第一次食到；所以你見我寫咁大篇文，係因為我覺得呢間餐廳，就算平時黎食啲咩生日飯週年飯都值得黎。

講咗咁耐，呢間餐廳真身叫咩名？

話說呢間咁勇敢選擇同《陰陽師》合作搞兩週年限定食店嘅餐廳，名為「SPARK Bar & Restaurant」，地址位於中環雲咸街 29 號 LKF 29 嘅 3 樓（4 樓為常規西餐廳），我地事後膽粗粗問店主，「一間開喺呢個地段嘅餐廳，同遊戲搞合作，你有無覺得件事好突破？」

「突…突破架。」店主吞一吞口水，但係好快變返一臉自信，「不過，我地啲野好食，想比更多人食到，有啲咩我都肯試下！」

講到咁，到底佢嘅食物質素如何呢？我地黎睇左 Menu 先。

餐廳配合角色形象，特製咗一系列 Image Menu，我地今次有機會試左 7 樣野，包括兩杯餐飲「鴆」與「玉藻前」，分別係「青檸薄荷梳打」以及「草莓檸檬梳打」，口味清爽又唔會太甜，草莓係即製鮮打，並唔係用糖漿！

其實現場提供含酒精飲料，不過我不能飲酒，有興趣嘅朋友可以試埋「鬼使白」以及「鬼使黑」，是兩種口味不同的 Volka 調酒。

餐飲「鴆」與「玉藻前」 HKD 78

飲品只係前奏，重點當然係佢嘅食物；店家好友善地請我地食沙律前菜「鬼切」，真身為嫩火箭菜紅菜頭伴奶油芝士。我本身並唔鍾意食紅菜頭，一直嫌佢略帶植物腥味，但係佢嘅沙律調汁香而帶點微甜，令到沙律變得非常開胃，結果都係清碟的。

「鬼切」HKD 128

開胃過後正式上菜，呢一味「白藏主」一送上黎我已經雙眼發光：無諗過食主題餐廳會食到海鮮！呢味「白藏主」其實係墨魚片伴海膽以及三文魚子，加少少蛋黃調汁，好味程度係：兩個人食，五分鐘內清碟，入口甘甜鮮味，就算你話「哦，你食白藏主！」我都唔會理你架喇，好味到我想厚面皮 R 多碟……無啦，我忍住 orz

「白藏主」HKD 198

第二款前菜係我抽極都抽唔到嘅 SSR「妖刀姬」，真身係香炸魷魚，佢仲特登擺到刀形咁嘅擺碟，伴以墨魚醬汁。微咸又不油膩嘅口感，再次令到呢味菜五分鐘內又清碟……明明我本身唔係咁肚餓，但係我一向鍾意食香口野，所以可以大大啖將「妖刀姬」食落肚真係一種異樣的幸福，我終於擁有你啦哼哼哼。

「妖刀姬」HKD 148

如果樓上兩樣五分鐘清碟嘅前菜，好味程度係 10/10 嘅話，以下呢一味「御饌津」，我諗我想超唔合理地幫佢評分為 100/100（喂）。其實佢係香蒜汁烤豬扒伴南瓜蓉，附加超薄青蘋果片，聽落去係非常傳統嘅配搭；但係，豬扒鬆軟有油香，南瓜蓉甘甜順滑而不膩，兩樣夾埋一齊食，嗰中溫中帶熱喺口中擴散嘅滋味，我個腦，閃過左「感恩」兩個字。

開工開到有咁好食嘅野，我好感恩呀……呢一味「御饌津」，係我強力推薦比在座咁多位朋友嘅主菜；因為胃部 Quota 有限，食唔到佢個肉眼「茨木童子」，但係如果一味豬扒都可以做到咁好味，我相信牛扒都一定有佢嘅吸引之處。

一定要叫呀，真係好好食，為左呢一味「御饌津」，我想下次做完野自己再黎呢度食一次。