ALTUS 與 Vanilla Ware 共同開發嘅原定 2018 年上市，後來又於 2018 年尾宣佈中止開發 PSV 版本嘅《十三機兵防衛圏》，去到今日又有新消息，就係將於今年 3 月 14 日發售遊戲嘅序章《十三機兵防衛圏 Prologue》，PS4 平台限定。

雖然正傳遊戲仲未正式開發完成、依然率先將遊戲序章公開發售嘅做法真係極為創新，但係官方強調呢個 Prologue 版本可以比玩家試用哂「以 13 位角色觀點推展嘅故事序章」嘅部份，預計最少遊玩時間為 3 小時左右；但係官方就話呢啲 Save Data 去到遊戲正式推出之時，係唔可以引繼落正傳遊戲遊玩的……唔知咁嘅安排，各位玩家又點睇？

《十三機兵防衛圏》以 80 年代日本為舞台，世界陷入破滅前奏，遊戲故事就係要玩家飾演被選中嘅 13 位少年少女，以佢地嘅視點去推進故事。

由於遊戲畫風以及仿橫向捲軸玩法獨特，所以遊戲初公佈時引起唔少玩家注意，包括我在內！所以 Prologue 我都係會玩的，不過始終希望遊戲正傳都能夠繼續順利開發！