萬花筒呢家野呢個年代唔知仲有冇細路玩過，我諗唔係依家讀通識要學「光的反射」都可能唔會知有萬花筒呢樣野！其實要用 LEGO 去砌個萬花筒唔係算好難，1994 年嘅 LEGO Invention Adventure Activity Book 入面就己經 Step by Step 教玩家用基本嘅組件去砌個萬花筒。

當然 94 年嘅時候邊有咁多新件去做靚個外觀同效果，而且當時教學都只係教用張白紙去反光，睇出嚟的確唔算好靚。再唔係就好似舊式產品加張鏡面貼紙扮塊鏡，咁當然效果都唔算出眾。直到 2015 年嘅 10246 Detective’s Office 入面，官方仲生產左一件鏡面件(20193)。雖然都唔算喺好多創作上見得到，但好似一啲靠「鏡」去產生錯覺嘅玩意都可以 LEGO 化。

日本創作者 Kei_8thnote 喺 2016 年就係靠住用呢塊件去創作左個效果又靚、外觀又好睇嘅 LEGO 萬花筒 (LEGO Kaleidoscope)，仲要擺埋上 LEGO Ideas 集 Support，不過可惜都只係拎得百鬆啲票就要打道回府。不過咁耐以嚟佢都冇放棄過 LEGO 萬花筒 呢個計劃，而最新版本仲要電動之餘，仲可以做到高隨機性，唔會不斷重複同一組圖案。

紅黑係第一代，白色係第二代，而黑色就最新版本

睇落好似好複雜呢？不過其實萬花筒內部就只雖要每面放到一件鏡面件就做到萬花筒效果

個球體都只係 Jurassic World 所用嘅波波 (20455 Half Sphere)

底座預留左位置放燈，而機械組件亦唔算複雜

一個兩箱、一個M-Motor、兩個 40T 齒輪同一個蝸齒輪就搞掂晒

效果係點就大家都有目共睹，雖然 Kei_8thnote 嘅 LEGO Kaleidoscope 唔可以成為 LEGO Ideas 嘅產品，但教到大家點樣簡單做到，都係一件對各玩家開心嘅事！

Kei_8thnote 作品 flickr 傳送門