橫向動作遊戲一向都歷久不衰，而且亦都係 Indie Game（獨立遊戲）既熱門類型之一。上年就有隻出類拔萃既《Dead Cell》，而今年除咗有萬眾期待，惡魔城之父五十嵐孝司既《Bloodstained》之外，仲有另一隻叫做《Feudal Alloy》既遊戲不容忽視，而且今個月就正式出街啦！

《Feudal Alloy》採用充滿特色既手繪畫風格，而玩家則扮演操控住機械人騎士既金魚 Attu。故事講述金魚 Attu 原本只係一個普通既農夫型機器人，不過突然被人班壞人襲擊村莊，偷走佢地既石油，仲燒埋佢間屋。金魚 Attu 逼於無奈之下拎起武器逃入森林裡面，而係森林入面竟然係一個巨大既世界，面臨各式各樣既敵人，金魚 Attu 點樣突破難關，重返家園，就睇玩家玩成點啦。

本作畫面睇落好似好簡單，但細心留意就會發現製作團隊花咗唔小心思係美術上面，不論場景到角色設計都充滿住濃厚中世紀歐洲味。而且遊戲中既動作表現亦都令人滿意，流暢度甚高，攻擊判定明確，據聞難度仲會有保證添。

當然基本攻擊之外，玩家仲會有唔同既技能幫助你殺敵，例如令到附近敵人觸電麻痺、漿住敵人令佢無法移動等等，豐富而有趣。

大型Boss 點少得

隨住遊戲推進，玩家會獲得各種武器及防具，係《Feudal Alloy》亦都有紙娃娃系統，即係玩家換裝備，角色外觀亦都隨之而改變。當然除咗外觀之外，技能樹、打寶、隱藏區域等等元素一應俱全，相信動作遊戲迷絕對會收貨。

《Feudal Alloy》將於 2019 年 1月18日正式發售，對應平台為 PS4 / Xbox One / Nintendo Swtich / PC Steam。