趕在 2018 年末上架嘅《Judge Eyes 死神的遺言》，因為起用木村拓哉作為主角，所以無論官方抑或大眾都對遊戲投以極高注目度；不過，一個遊戲好無玩，始終唔係淨係靠「有明星擔旗」就能成功的。
同樣出品自「人龍工作室」，《Judge》公佈嘅時候，其實網路上面曾經一度出現頗為兩極嘅反應，分別係「唔係《人龍》Fans 但係覺得有木村好似好勁，所以想買黎玩」，另一種就係「唔怪得《人龍 6》結局搞到咁，原來啲資源留哂黎做木村新 Game」。
作為一個《人龍》Fans，我喺第一次玩《Judge》Demo 時，其實我都好明白點解 Fans 心中有啲酸溜溜，畢竟「桐生一馬」幫「人龍工作室」打響旗號，但係去到結局第六集，得罪講句，劇情都幾狗血的，而且無啦啦將遊戲轉用一個發展未完善嘅新系統……當時已經有好多 Fans 喺 Twitter 上面講「點解要拎最重要嘅最終章黎做新系統測試啊？」
或者真係為左迎接呢隻有木村大神嘅《Judge Eyes》吧，唔知，是但，反正呢啲商業操作嘅野，我地點諗都唔會得知真正答案。
作為一個玩家，我只係在意個遊戲好無玩而已。
前言好長，對唔住，咁到底講左咁耐，《Judge Eyes》好無玩？
答案係好玩，就算主角唔係木村，就算主角同埋配角換成完全虛擬嘅原創角色，呢個遊戲，依然好玩。佢嘅好玩之處，在於佢嘅劇本。
可能你會話，遊戲系統上面依然帶著強烈《人龍》影子，咁我又咁睇啦，「人龍工作室」整好左神室町嘅模組之後，相信以後好多遊戲都會《人龍》套路咁樣創作落去架啦，好聽嘅叫「建立出獨有世界觀」以及「令 Fans 留有共鳴」，直接嘅可以話佢「環保」（喂）；咁既然係玩換湯不換藥嘅話，點樣喺舊有設定上面帶比玩家新鮮感，劇本寫得好唔好，絕對係非常關鍵。
當時工作室拎《人龍 6》黎測試嘅「無縫地圖系統」，黎到《Judge》可以話係改善左極多，玩家遊戲中可以去到更多橫街窄巷，雖然唔知點解幾層樓跳落街都唔會扣 HP，不過，都係一個好轉變黎。
遊戲今次唔係純粹打爛仔交，而劇情亦都無《人龍 4》打後嘅集數咁樣婆媽而狗血，木村飾演嘅八神，係一個非常有血有肉嘅角色，佢並唔係咩偉人，佢只係一個好單純地，因為某個原因（唔劇透啦）所以不得不流落神室町、從而受東城會松金組照顧、又因此努力成為律師嘅年輕人。
八神當年幫大久保打甩左一條「殺人罪」，但係轉過頭，大久保再次因為「殺害女朋友」一事再次被告謀殺，八神受唔住周遭指責，話佢「縱容殺人犯」，所以退下法庭，轉身成為徘徊喺小混混世界裡面嘅窮偵探。
以上，係遊戲起初大家就會見到嘅劇情；但係，隨時劇情推進，呢個故事劇本一啲都唔簡單，無論人物勾劃，劇情堆疊，都令人睇得著迷。
相比起《人龍》系列，《Judge》描繪嘅黑道世界更加真實、更加黑暗、更加血腥，我諗，世嘉又好，創作《Judge》故事大綱嘅名越都好，或者都終於願意比自己跳出佢地 Set 比自己嘅安全網了：如果大家有玩過從前嘅《人龍》，或者你都會與我一樣有同感，就係遊戲中嘅黑道或者奸角，都太左膠，或者「做壞事總有苦衷」，總之就唔能夠比一個角色係「天生 100％ 就是壞人」。
而《Judge》入面，便當同埋血漿都派得很爽快，主要幾個惡人角色，亦都係玩到人牙癢癢想一把刀車埋去；呢一點，係以前《人龍》略嫌過份溫和嘅劇本裡面做唔到的。
為左突顯遊戲與《人龍》係兩個完全唔同嘅系列，《Judge》喺玩法上面都作出幾多微調，例如支線方面，一於事前所料，主角係 Johnny’s 平成年代最強代表之一嘅木村大神，所以《Judge》裡面果然係無得經營水商售的，同時遊戲中亦都無左「唱 Karaoke」呢個傳統活動，咁我都明嘅，我諗要木村唱歌一定好貴。
至於歷代人龍都有嘅「儲物櫃鎖鑰」收集支線亦都移除左，取而代之嘅係今集大玩「無人機」，玩家需要周圍收集製作零件材料；不過，材料基本上會不斷在原地再生，所以嚴格黎講並唔係強制收集。
除左無人機，話明八神係做偵探，所以遊戲入面少不免有大量小型案件支線，需要追逐、搵證據、爆鎖以及跟蹤。呢幾個變化係好玩嘅，不過「跟蹤」呢個玩法去到後期，我覺得用得太多，玩到我有啲煩躁（喂）
至於「無人機競速比賽」同埋「VR 雙六（即係類似大富翁咁嘅遊戲）」係首次出現嘅小遊戲，幾好玩的，難度適中，就算要玩哂都唔覺得係折磨。
不過「無人機競速比賽」亦都見證住世嘉開始識玩「課金商法」呀 XD
首先你嘅速度係可以上載上網同其他玩家比拼，之但係，如果你想要啲高性能機架或者配件，其實要出 PS Store 買架！叻呀你！你問我機能差幾遠？遊戲中頂多比 160 – 180 Quota 你，但係比現錢買嘅就閒閒地 200 – 300 咁囉 LOL
好彩我唔係好勝 Gigi，呢一部份我就唔強求了。
戰鬥分為「圓舞」以及「一閃」兩種形態，今次我地嘅主角八神畢竟係個同黑幫關係好親近嘅良好市民，所以唔知係咪因為咁，佢唔似桐生大叔咁樣可以隨身裝備武器，當年人家我可是隨身一把櫻吹雪見雜魚就斬呀……而家，我就唯有玩單車＆雪糕筒無雙了。不過兩種戰鬥形態的確有微妙嘅分別，前者比較似街頭打交風格，後者則比較似中國武術。
題外話：作為一個中途出家嘅無幫派小混混黎講，八神師兄你都真係好打得太緊要 LOL
至於有部份朋友話「點解遊戲見唔到以前《人龍》啲角色架？」，其實聽到呢個問題我心情都幾複雜，到底你地係想「人龍工作室」向前走，定係想佢地一直消費舊人舊回憶黎換取你地一秒掌聲呢？
當然，我相信如果遊戲有續集，不排除總會有一日能夠再次見到真島（東城會）以及秋山（神室町放數佬）呢啲角色嘅面孔，不過，如果工作室想藉神室町呢個地方，建設一套新嘅世界觀，我反而覺得更值得玩家尊重吧……
同埋，遊戲中並唔係毫無舊人回憶架。去食飯、去 Bantam 飲酒等等，有無留意背景音樂播緊乜？咪就係播緊桐生一馬嘅首本名曲囉！將舊人回憶套用喺呢啲位，我覺得用得靚架！
當年嘅地下水道唔再連去賭場
地下賭場變成另一個地方
睇到呢套，或者已經玩爆機嘅朋友，或者你地會明點解我喺題目度話「木村大神只係錦上添花」，因為遊戲精彩嘅劇本，本身已經好吸引；但係當然啦，劇本以及對白部份，好多都係為木村度身訂造的，唔少動畫中嘅對白，睇開日劇或者日本邦畫嘅朋友，應該不難察覺「呢句對白好有木村嘅味道！」
但係就算無得玩夜總會，八神呢個角色依然唔係高不可攀的，遊戲中有唔少惡搞向嘅元素，用在木村身上，的確樂趣倍增；例如下圖呢個……喂世嘉你居然玩《逆轉裁判》咁玩得 XD ？！
篇幅有限，部份情節例如「同時追四個煩膠女仔」呢啲內容，我就不多說了（喂）如果你係《人龍》Fans，我覺得，如果你願意比機會《Judge Eyes》，我諗玩到最後，你唔會覺得後悔的；如果係未玩過《人龍》嘅玩家就仲簡單，呢隻遊戲作為 2018 年尾最後一隻精彩作品，相信絕對有你享受嘅部份喺入面。
感想文好長，多謝睇到呢度嘅每一位。
最後送上木村參與製作嘅影片：
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。