對於有玩開文字型遊戲嘅朋友黎講，Key 社，相信係唔少人心中嘅神殿；而麻枝准先生，相信亦係唔少 Fans 心中嘅偶像。《Air》《Clanned》《Rewrite》下略好多名作唔一一提及，就算你無玩過遊戲，或者都會睇過動畫，或者至少，會聽過個名。

Key 社作品，到底有咩吸引力？

厲害，就係在於佢本身明明係 H Game 公司，但係去到後期，根本無人 Care 佢嘅 H 描寫，所有玩家，都只係關心佢嘅劇情，佢嘅人物勾寫，佢嘅起承轉合。佢嘅劇本，細膩而令人難以忘懷，感動但又令人心酸，唔止係男玩家，女性玩家界別，都有好多 Key 社作品 Fans。

Key 社今年 6 月份時推出左全新作品《Summer Pockets》，遊戲舞台設定為「鳥白島」，一個只有二千人口嘅鄉村小島。男主角鷹原羽依里為左收拾去世祖母嘅遺物而黎到呢個地方，與四位女主角相遇。明明理應係第一次黎到呢個地方，但係所見所聞，唔知點解，都令男主角心裡有種懷念的感覺。

咁麻枝老師寫嘅劇本當然就唔會淨係「少年少女戀日記」咁簡單片面嘅故事，到底今次呢個遊戲準備左幾虐心嘅故事迎接大家，有玩 PC 版嘅朋友，唔好劇透；有玩手機版嘅朋友（無錯，Key 社大部份作品已於日版 App Store 上架，不過要逐個路線課金，我會比較 Prefer 要返單機版），你都唔好劇透住。

手機版畫面

如果你同我一樣鍾意玩 Console 版嘅，《Summer Pockets》將於 2019 年春季正式於 Switch 平台上推出。

都市人生活繁忙，文字型遊戲喺香港黎講唔算係熱門遊戲選擇，不過我呢啲死忠玩家就點都會玩架啦（笑）唔知在座有幾多 Key 社 Fans？呢隻作品你地又會唔會入手呢？