早兩日睇左《水行俠》嘅 Special Preview，睇完發覺真係不得了！可能係DC近年最好嘅電影！

只有《Wonder Woman》站得住腳嘅DC，經歷過《Suicide Squad》同《Justice League》兩次挫敗後，今次《水行俠》帶黎全新嘅體驗，原來《水行俠》都可以咁拍！導演溫子仁話你知，DC唔使一定要行黑暗風格嘅。

係《水行俠》入面，Jason Momoa 飾演嘅 Arthur Curry/Aquaman(水行俠)，外形比起漫畫更加豪邁及粗獷。大家一開始都會認為無選用同漫畫一樣金髮嘅演員係大錯，但係呢套戲成功創造左一個另一個深入人心，與別不同嘅水行俠。但係同時佢亦係一個情竇初開嘅小男孩一樣咁純情，同梅拉 (Mera) 嘅感情線甚至係掛住媽媽嘅心情都顯示出佢都係一個普通人。電影中主要就係描述 Arthur Curry 嘅成王之路同佢嘅成長。今次電影入面都講解左其中一名宿敵實話實說，我覺得本作嘅兩位女角都係相當出眾，Amber Heard 飾演嘅梅拉，同埋 Nicole Kidman 飾演嘅亞特蘭提斯女王亞特蘭娜 (Atlanna)，好睇又好打(心心眼)，無得輸。

值得一提嘅係於《Justice League》時候嘅水行俠係有啲憎恨佢媽媽嘅情緒，但黎到個人電影，變成左自責。另外，梅拉係《Justice League》提到自己父母已經戰死，但係《水行俠》入面梅拉父親 Dolph Lundgren 飾演嘅湼羅斯 King Nereus，都係一個重要嘅角色。

係劇情方面，整部電影節奏明快，唔拖拖拉拉，每個場景都會有事發生，但又唔會睇到你好攰好難跟。好似水行俠童年嘅故事同電影要表達嘅意思，基本上頭五六分鐘就已經交代曬，對於少睇戲嘅觀眾都非常易入口。整體上，前段放嘅伏線，後段都全部收回，鋪排令到所有野黎得好自然，無一種好突兀嘅感覺。整部電影要帶出嘅我覺得係愛，父母嘅愛，對兒子嘅愛，國王對子民嘅愛，跨種族嘅愛，甚至跨物種嘅愛，同時要喚起我地對地球嘅破壞，環境保護嘅概念，要愛人之餘亦要愛護海洋。

而美術方面，溫子仁完全打造出一個好特別嘅亞特蘭提斯，同時係某啲情景上運用返佢拍恐怖片嘅手法。佢最厲害嘅地方係佢會用 Jump Scare 嚇你，但係喺造型、氣氛定配樂上，唔會令你恐懼，反而係帶出一種緊張情緒，佢可以將恐懼同緊張嘅情緒分清楚咁表達，技巧實在非常高超。而作為商業片，本作嘅鏡頭運用亦非常出眾，當中亞特蘭娜嘅室內打鬥同意大利嘅屋頂追逐戰令人目不暇及，非常逼力，緊湊，連貫。不得不提，係意大利嘅打鬥雖然分兩邊進行，但當中用鏡頭黎連接嘅手法非常出色，令整場打鬥沒有跳來跳去的感覺，非常順暢。對於大場面嘅控制，呢套電影都俾到震撼感你，最後嘅一場大戰令我印象深刻，就好似魔戒嘅聖盔谷之戰一樣咁令人壯麗，所以絕對建議大家選擇睇大銀幕或者 IMAX。

但唯一可惜嘅地方係，《水行俠》無一首好搶耳嘅標誌性主題曲，唔似《Wonder Woman》有一首令人一聽就知係屬於佢嘅配樂，呢一點係唯一最可惜嘅地方。

至於水行俠嘅特色，能夠同魚溝通嘅呢個超能力，溫子仁完美地令佢成為異常搶眼嘅超級英雄，原來同海洋生物溝通係可以咁型。大家睇完應該都會同我一樣咁想擁有呢種能力。順便講埋，關於水行俠同海洋生物有一個小彩蛋，就係騎海馬，係電影中呈現，原來並不是想像中咁奇怪，而係好有型，雖然隻海馬並非叫 Storm，但亦叫一眾DC Fans大叫過癮！另外，其實本作有隱藏到 Annabelle 嘅小彩蛋，咁就睇下大家夠唔夠眼力睇到喇！

我見到網上有言論話點解亞特蘭提斯一個科技咁發達嘅地方會重用緊封建嘅帝制。我想講嘅係，呢個係漫畫嘅水行俠設定，其實無得改，一改就會變成另一個完全不同嘅故事，所以呢個並非一個大問題。(反而同《Justice League》嘅連接咁少而且有些少唔接軌嘅劇情，可能真係想當《Justice League》無拍過～)

一套咁出色嘅DC英雄電影，大家都一定要去睇呀，將水行俠拍得咁歡樂，睇完一齊過個歡樂嘅聖誕節啦！