【廳度閃閃吓】聖誕出去睇燈飾？喺屋企砌燈仲歡樂

聖誕前要送禮物比 LEGO 玩家其實從來都唔頭痛，皆因就算買重複左嘅話，最多咪開埋砌大佢或者睇下有冇 AMOC 可以改建。但如果想避免埋對方收到之後打開一刻話「其實我有啦！」呢個老尷位，今日有個好推介比你！如果要聖誕送禮又想唔撞重複，其實好多玩家近年都開始將佢地砌完嘅作品加燈，不過市面上平至淘寶、貴至訂造嘅都有，今日我就 10247 Ferris Wheel 摩天輪 完成品去介紹比大家咩先至係有水準嘅燈。

點解要用佢嚟示範，原因係佢比大屋 (Modular Building) 多左運轉動作，而且佢嘅運轉方式比 10257 Carousel 旋轉木馬複雜。

問過好幾間唔同嘅燈飾產品，唔係冇整過 10247 Ferris Wheel 摩天輪嘅燈，就係答話用「所謂」嘅無線供電，但其實無線供電裝置有距離同供電 Size 限制，所以燈飾效果唔會穩定

當然所有都要用返 LEGO 件啦

我主要做轉輪兩組燈，而且啲線收得靚靚都只用左大約個零鐘時間就完成

電箱放喺摩天輪中間，咁就唔會有”卡”線嘅問題

好多玩家喺上燈嘅時候都會問到一個問題「啲電線點樣可以收得靚？！」對唔住啦，呢啲真係心機同耐性野，你幾粒燈就咁放上去真係隨時三分鐘搞得掂晒！但如果你想用三分鐘但收靚啲線嘅，我勸你一係比人整、一係唔好加。雖然我都未可以做到收到完全見唔到，但絕對唔係飛晒出嚟比人見到嗰隻！

其實好多嘅燈飾都係用返 LEGO 原件去做，件與件之間有時唔係完全「密籠」，好似示範嘅 10247 Ferris Wheel其實係有住好多空間比線走位，呢啲位置你就可以將多餘嘅電線綑喺當中固定，咁你就會令啲線唔會周圍飛。所以燈飾喺製造嘅時候如果手工差啲都隨時斷線，加上走線又綑又夾，質素差嘅電線都係好易會整斷。