2019 年頭有好多精彩遊戲即將上架，例如於 1 月25 日同日推出嘅《Kingdom Heart 3》以及《Biohazard RE: 2》等等，相信各位玩家點都會玩其中一隻。

不過，曾製作《DARK SOULS》系列嘅 Form Software 最新力作《SEKIRO: SHADOWS DIE TWICE（隻狼）》雖然 3 月 22 日先至推出，不過佢於 Steam 上面嘅期待值已經力壓其他所有遊戲，榮登 Wish List 第一位！

Twitter@simoncarless

發現呢件事嘅人係企劃 Game Developers Conference 嘅 UBM 公司副總裁 Simon Carless 先生，佢於 Twitter 上提出呢件事之後馬上受到網友注意；雖然 Wish List 主要係講緊玩家對於未推出市面嘅遊戲期待值，而唔代表隻遊戲係咪真係受歡迎，不過見到《SEKIRO》名次位居《Bio RE:2》以及《DMC 5》之上，真係估唔到有咁多玩家同我地一樣原來係 M 屬性，而家已經期待住 3 月份去送死（喂）

OK，又或者等送死嘅只有我，不過我地編輯部曾經兩次喺唔同場合試玩過《SEKIRO》第一章，我就玩左十次都輸比首章個大佬（佢每次去到第二段階開始隱身，我就反應唔黎），而我地曾經用 30 以下 Lv 壓等完美衝破《DARK SOULS 3》嘅總編，都要玩左好多次先過到關，所以你明唔明點解我話大家係 M 屬性……

不過，動作嘅靈敏度、唯美而細緻嘅畫面都極令人心醉，加上遊戲嘅美學就係劍技，所以刀鋒交接時嘅鏗鏘聲每一下都震撼人心，雖然我有預感呢隻遊戲可以玩好耐（因為有排都爆唔到機），佢依然係我地 VJGamer 來年最期待嘅遊戲之一。

遊戲將於 2019 年 3 月 22 日推出，對應平台為 PS4、XBox 及 PC！