黎到年尾，作為美漫迷有好多戲要睇，早兩日走左去睇英文版優先埸嘅《蜘蛛俠：跳入蜘蛛宇宙》，睇完返出黎覺得好滿足，Sony Pictures 繼 Spider-Man: Homecoming 後又再威多次喇！

睇之前我特登去睇過Rotten Tomatoes俾左滿分，心諗係咪真係咁犀利呀?點知入場真係令我好驚喜。

首先，整套電影係用色同畫面方面，係做得非常出色。將電影藝術與漫畫完美結合，你嘅感覺係睇緊一本會郁有聲嘅漫畫。《蜘蛛俠：跳入蜘蛛宇宙》巧妙地將漫畫嘅重要元素(例如對話框架，心聲)係電影呈現出黎。有別於一般動畫電影，《蜘蛛俠：跳入蜘蛛宇宙》嘅美術風格係揉合各種流行文化及Graffiti嘅成品。有日本漫畫風格嘅角色，有卡通風格嘅角色，亦有只得黑白世界嘅角色，都可以睇到美術中下嘅苦功。音樂方面，以黑人青年鍾愛嘅HipHop為主，加上畫面嘅配合亦都呈現出呢套電影嘅獨有風格。

故事方面，爽快嘅節奏充滿驚喜，令你完全投入《蜘蛛俠：跳入蜘蛛宇宙》嘅世界。佢唔會俾觀眾係同一個情緒沉醉太耐，點到即止，好快就會又去下一個情節，但你唔會覺得佢急，因為佢每件事都會交代清楚。即使你唔熟悉呢個超級英雄你都可以好好享受呢套電影，如果你係fans的話，你會睇得更過癮更開心。而且，電影想表達嘅訊息亦好集中，同時表現出蜘蛛俠會遇到嘅問題，同我地會遇到嘅其實好似。當中有啲情節，睇完你會會心微笑，亦會哄堂大笑，笑位恰到好處。電影中嘅角色各人性格分明，亦同時好有人性，令到蜘蛛俠好有親和力，好「貼地」。電影好好咁樣運用左角色嘅反差去令我地去重新思考「蜘蛛俠」呢個英雄嘅人生。

總括而言，我係非常推薦呢部電影《蜘蛛俠：跳入蜘蛛宇宙》，我相信呢套係本年度最佳動畫電影，佢唔止係一套電影，佢嘅用色，鏡頭，故事，含義，深度，完全係一套藝術品。我睇嘅係英文版，係我二刷嘅時候應該會睇一次中文配音版，相信有唔同嘅體驗。呢部電影，值得你去睇第二次。(入面仲有好多彩蛋添！)