有讀者曾經問過我地編輯部會唔會為推出左已經好一陣子嘅《Fallout 76》寫遊戲感想，我地嘅答案係會的，但唔係而家。

作為 Bethesda 社首次推出嘅《Fallout》開放世界 Co-op 遊戲，《Fallout 76》喺推出首個星期，啲 Bug 多到有啲主線任務根本無法完成，整 Camp 又多問題，總之令玩家黑人問號嘅地方多到講唔哂。

於是，上星期佢地出左個 50gb 嘅更新，話修正遊戲咁話。先唔好講點解遊戲更新同一個主體遊戲差唔多咁大 Size，重點係根據我地親身經驗，更新完之後遊戲裡面嘅問題都唔係好有明顯改善，下載版嘅朋友（好啦，其實係我地網站嘅總編）半小時內遊戲可以 Crash 三次 Crash 到 PS4 Pro Hang 埋機，都真係幾令人氣餒。

但係，遊戲其實唔係唔好玩，佢仲有好多元素等待我地去發掘；因為我地明白由單機遊戲轉為 Open World OLG 唔係易事，所以，我地決定比機會 B 社，比機會《Fallout 76》。

B 社剛剛公佈將會在 12 月 4 日 及 11 日進行兩次更新。

12 月 4 日更新：
・物資儲存上限從 400 件增加至 600 件
・玩家打敗 BOSS 後會得到 2～3 件道具獎勵，獎勵內容則視乎 BOSS 嘅等級而定
・隨住玩家被冷凍槍擊中次數，玩家會有不同種類嘅 Debuff，因此而產生嘅減速持續時間，由 2 小時下降為 30秒
・因為超重而死亡時，玩家可揀選喺最新發現嘅地點重生
・修復玩家無法脫離 Power Armour 的 Bug

12 月 11 日更新：
・PC 版新增支援「21：9」螢幕比例
・PC 版簡化語音聊天設定
・玩家達到 50 級後，可以自由選擇搭配 PERK 能力卡片
・CAMP 添加「移除」功能，可清除地形上的樹木、岩石或其他障礙物
・如果玩家 Offline 後，原本設置 CAMP 嘅地點有其他玩家佔領，玩家將會收到通知，並能夠在地圖上免費選擇新嘅 CAMP 地點，亦可以選擇直接切換 Server

B 社同時喺 Reddit 上面向玩家公開謝罪， 話團隊喺遊戲推出初期，缺乏關注玩家嘅意見同埋聲音，令到好多玩家感到不滿，亦有好多地方未能夠盡善盡美。呢個 Post 一出，Reddit 下面啲留言當然係毫不留情地鞭打 B 社，有人話你出黎認衰係一回事，黎緊有咩辦法改善遊戲先係重點。

不過，能夠正面出黎面對玩家，B 社都算係咁，總好過潛水當無事發生。雖然我認為《Fallout 76》一開始其實唔應該咁早出，如果 Delay 多半年，話唔定好多 Bug 或者系統上面嘅問題都會減少好多……

到底 12 月更新完之後遊戲會唔會挽回到玩家嘅信心呢？我地會繼續留意的～