《人中之龍 Online》感想題目為：SEGA 媽媽你好嗎？

早前世嘉宣佈會有《人中之龍》系列嘅新作，會係一隻手機Game。冇錯其實當初都已經打定輸數，放得上手機做平台，唔會係咩突破性嘅遊戲。但因為對人中之龍有愛，所以點都事前登錄左先，世嘉出品的話差極都有個譜。但係，事實又係點呢？

首先，點解好地地一隻以寫實畫風為賣點嘅《人中之龍》，會變到美漫唔似美漫，日漫又唔夠日漫嘅漫畫呢？我唔介意你將佢完全變成日漫畫風，將3D變成二次元，都唔想見到你張佢地畫到好似2.5次元咁嘅奇奇怪怪角色。卡入面D人就喺到chok下chok下, 就好似叫做立體左，呀哥，可唔可以認真少少？

你或者會話「喂畫風呢家野個人喜好姐，你唔鍾意唔等如就係屎」，Ok，我認同呢個point，所以我雖然唔鍾意但我覺得呢樣野可以包容，下一步就係開聲聽。咁請問點解，除左重要劇情佢係會讀曬成句對白之外，其餘每一段都只係「おい！」，「あ？」呢D只有一個音節嘅感嘆詞，然後其餘煩請你自己睇對白寫咩？隔離老任出嘅《失落龍絆》，雖然都係同類型以visual novel交帶大部份劇情, 但人地聲優真係每一個場景每一幕都讀足曬D對白。人中之龍作為一隻大作品，點解連呢一點都做唔足？

又有人話，妖我平時地鐵打機都唔開聲架啦，飛左D對白有乜野問題先？Fine，畫面我可以忍，聲我可以唔聽，玩法冇得唔理啦掛？就好似我一開頭咁講，手機game出得黎已經冇野可以期待。到最後又只不過係迎合番現時最流行嘅遊戲模式：首抽，砌隊，打素材，強化角色，技能。

遊戲過程呢？得架啦你隊入面Ｄ人會自動打敵人，夠一定時間就可以開下技，之後大技bar儲夠point你可以禁一下叫個角色開大技。完左一波就會有下一wave，最後打boss。好坦白，呢種回合制嘅手機遊戲真係好悶。

隻game免費，你要諗辦法叫人課金抽野去維持營運我理解，但玩法可唔可以多元Ｄ？人龍系列本身個格鬥系統已經唔係特別複雜，但你連格鬥操作都唔放落去，我真係唔想望住個芒睇住D電腦 喺到自己打…

呢種熟悉嘅《人中之龍》遊戲畫面只係喺PV會出現，但game入面係冇的。

「喂手機game係咁架啦，我要玩到咁刺激我玩番console唔好？」雖然呢一點我唔係完全同意但我都可以叫做理解，正如本人係會非常睇唔起果d用手機食雞，打MOBA然後重要當係電競同講技術嘅玩家。在下都有玩FGO（冇錯，眾所周知另一隻糞game），因為在下對Fate系列有愛，所以就算明知佢糞我都會繼續當打工咁玩下。
我相信我同大家download《人中之龍online》都係因為鍾意佢呢個系列。

敢問大家，《人中之龍》入面最核心，最重要，最不可或缺係乜野？係桐生一馬？係發明星夢然後比人搞大肚嘅天真遙？定係入面非常獨有嘅熱血動作格鬥場面？

全部都唔係，係你陪住桐生一馬由第一集去到第六集當中所經歷嘅男人情懷，包含義氣，身不由己，愛情，但又不擅言詞嘅各種心路歷程，每一集都有令大家諗桐生係為咩而戰。人中之龍一向以背景同人設成為遊戲嘅最大賣點，但請問，呢一隻垃圾《人中之龍online》，可以帶到d乜野男人熱血比我地？加上呢Ｄ情懷，唔係用visual novel可以成功地傳遞到比玩家，一定要好似其他人龍作品咁有一定嘅cinematic clips先會更易代入。

寫左成一千幾字，我唔知自己算唔算得上係愛之深，責之切。我同身邊幾個朋友都好想問候世嘉全家，唔係因為佢要人課金，唔係因為佢玩法無聊，而係因為佢打住《人龍》個名頭，但做左一隻垃圾出黎，而完全不能有《人中之龍》帶比我地果種代入感。一句講曬，冇日版itunes嘅人龍fans可以唔洗浪費時間去開一個account。

（冷靜後再略評: 我唔清楚佢係咪有PVP嘅內容，有又做得好的話或者可以提高番少少評價，但歸根究柢，《人中之龍》唔係一隻講求玩家對戰嘅遊戲，所以亦唔見得有彌補到我所提到嘅核心問題。)

－－－－－－－－－－－－－－－－－－

VJGamer 歡迎讀者投稿 – 如蒙投稿，請將文稿、筆名、作者簡介及聯絡電話，電郵至 [email protected]。