講起 Steampunk 風格嘅遊戲，大家比較熟識嘅都係《Bioshock》、《Dishonored》、《Thief》又或者大家都唔多記得嘅《The Order 1886》，咁當然仲有好多其他 Steampunk 風格嘅作品，不過以非第一身動作甚或至橫向動作嘅作品，近年就真係買少見少。

出開特技電單車遊戲系列《Urban Trial》嘅波蘭遊戲開發商 Tate Multimedia，今年就搞搞新意思，將特技電單車、橫向動作加上 Steampunk 風格，製作出呢隻《Steel Rats》。

故事背景其實都幾簡單，一個空想出嚟嘅 40 年代美國 Coastal City，突然受到大批被稱之為「Junkbots」嘅失控機械所襲擊；而玩家一開始就控制住「Steel Rats」呢個電單車四四幫其中一員「Toshi」去搵返失散左嘅其他三個同伴，同時一路對抗不同嘅 Junkbots 一路去追查背後嘅陰謀。

喺試玩版本入面，我地可以用到當中三個角色，分別係 Toshi、James 同 Randy，每個角色基本操控上都一樣，只係每個角色嘅攻擊模式有所不同，而遊戲當中每搵到一個同伴就等於多一條命，所以每版最多都只係死 4 次就要 Restart。

整個遊戲主要分 5 章，而每章有 7 個版圖。遊戲版圖同以往嘅《Urban Trial》系列最大不同，除左有 Junkbots 嘅攻擊同障礙物喺行車道影響玩家之外，行車道由單一車道變成兩條，即係話玩家好多時候都需要轉換行車道去避開障礙、攻擊甚至發掘隱藏路線或者道具。

而之前都講過，其實《Steel Rats》係一隻橫向動作遊戲，不過佢只係以電單車去作為操控角色，所以一啲橫向動作遊戲嘅關卡設定，好似追逐戰以及 Boss 對抗都會包括喺當中。

《Steel Rats》嘅整個操控亦可以話易學難精，因為要同時兼顧速度、攻擊、轉線三個基本（當然你慢慢行都得=.=”），再加上每版嘅特殊獎勵要求都有一啲特技相關嘅條件，所以要完成所有條件，都唔係玩一兩次可以搞得掂晒。

如果你本身就有追開《Urban Trial》又或者其他特技電單車遊戲系列嘅話，《Steel Rats》一定啱你心水。而呢排又覺得玩啲 3A 大作玩到滯滯地，想搵啲小品玩下過下手癮嘅，呢隻遊戲都合晒你選擇。《Steel Rats》中文版 11 月 29 號正式上市，不過就得 PS4 同 PC 有得玩！如果想喺 NS 度玩到嘅就要睇下之後有冇移植嘅機會啦！