《碧血狂殺2》（Red Dead Redemption 2）有幾正我諗唔洗點講，而且仲好有機會問鼎今年既 Game Of The Year 添！不過講大家又記唔記得上年拎咗 Game Of The Year 既《薩爾達傳說 曠野之息》同樣係有得騎馬、同樣地擁有極為出色既物理引擎，有唔少朋友甚至話《碧血狂殺2》係靚版《薩爾達》，咁到底將 2隻 Game 拍埋一齊對比會係點呢？

今次影片係由 ElAnalistaDeBits 製作，如果淨係想睇畫面對比既話，咁你可以直接上一頁架啦。淨計畫面《碧血狂殺2》絕對係狠狠地碾過《薩爾達傳說 曠野之息》，所以今次比拼主要係對比遊戲入面碰撞效果、馬匹 AI 設計、人物互動、環境等等細節。

第一個對比就係人物係火堆入面既反應，《薩爾達傳說 曠野之息》行入去係會令自己著火，而《碧血狂殺2》就唔會有反應，不過當你綁住敵人拖入火堆其實都會著火的

然後就係樹林環境物理互動比拼，係《碧血狂殺2》入面行入樹堆，樹係會被推開，而《薩爾達傳說 曠野之息》就無乜明顯物理互動

跟住落黎就係水中生物既 A.I. 比拼，係《薩爾達傳說 曠野之息》當角色接近，魚就會游走，當逼佢游到近岸地方時就會跳上岸。係《碧血狂殺2》同樣地當角色接近魚會游走，不過當逼到埋岸邊時，魚只會停留係原位。

然後就係同 NPC 互動部份，係《薩爾達傳說 曠野之息》不論林克點踩啲貨，企係櫃枱上面同店員講野都無分別。而《碧血狂殺2》你行入去櫃枱都會比店主鬧，呢點明顯做得比較好。

再落黎就係 NPC 既 A.I. 比拼。二款遊戲只要用武器指住 NPC 同樣會露出驚訝既神情，係《碧血狂殺2》入面 NPC 甚至會逃跑又或者拔槍反擊。

跟住落黎就係一連串既馬匹 A.I. 同物理測試。首先係《薩爾達傳說 曠野之息》入面，高速騎乘中撞到障礙物最多都只係停一停，然後就可以繼續飛馳。而係《碧血狂殺2》入面，我諗大家都好熟架啦，就係會「炒馬」。

咁係斜坡、高底差大既地方騎馬又會有乜分別？《薩爾達傳說 曠野之息》入面當斜度超過某一個點，就會連人帶馬跣返落去。而係《碧血狂殺2》入面，如果斜度、高低差太大同樣係會「炒馬」。

咁馬匹對外來反應又會係點？二隻面對係附近發生既攻擊都係無乜大反應，但係當有火焰出現時就會立即跑走，果然動物都係怕火既！

最後就係主角跑步時，馬匹識唔識得跟上主角。係測試中只有《薩爾達傳說 曠野之息》既馬匹會追上黎，係《碧血狂殺2》馬匹會長期處於一個固定距離，必需要主角停低先識得接近，呢點就明顯地前者做得較為出色。

影片中仲有好多唔同既測試，有興趣既朋友可以睇下。不論大家鐘意邊種設定都好，連續 2 年有咁出色既遊戲比大家玩，絕對係非常之幸福，希望明年繼續有咁出色既佳作出現。