《Destiny 天命 2》嘅第一個 DLC「遺落之族 Forsaken」已經於 9 月 4 日上架，唔知在座有幾多天命 Fans，亦唔知大家有無玩到呢個 DLC，根據編輯部其他成員嘅評價，呢個 DLC 其實係做得相當唔錯的。

不過，Activision 就唔係好滿意呢個 DLC 嘅銷售數字了，根據佢地公司 COO Coddy Johnson 嘅講法，佢地原本好希望「遺落之族 Forsaken」唔單止可以鞏固固有《Destiny 2》玩家對遊戲嘅歸屬感，亦都希望可以吸納到咁多新玩家願意入坑。

雖然講到咁，其實呢隻「遺落之族 Forsaken」又唔係真係賣得差，核心玩家之間嘅評價亦相當唔錯；Activision 之所以話對「數字」唔滿意，與其話係因為怕玩家唔鍾意隻遊戲，倒不如話係怕得罪啲投資者？

喂，雖然大家心知肚明業績賺錢好緊要，但係，聽到 Coddy Johnson 講出公司對於《Destiny 2》未來嘅目標係「creating new ways for players to engage further with Destiny and spend more money through microtransactions」之後，唔少玩家都忍唔住出黎嘈，意見主要為：

「點解要出咁多 DLC，根本係為咗坑錢」
「連改善遊戲重點都係為左想玩家駛多啲錢，而唔係為咗想令玩家感受最大樂趣」等等（詳此可以看這裡的留言區）

當然，亦都有部份中立玩家提出比較持平嘅意見，包括「遊戲某啲關卡難度，一定要既定人數（例如 6 人成行去打 Raid）先可以成功過關，但係基本上現實生活入面又有幾可能夠搵齊 6 個人一齊打呢？如果單機玩啲任務又變得好重復，得到武器獎勵等級亦無保證等等，睇黎各界玩家都認為，遊戲系統上仲有唔少地方可以改善。

《Destiny 2》其實已經推出左好一段時間，PS Store 曾經免費送過，PC 版亦進行緊兩星期免費推廣，期望多啲新玩家入坑；同時，黎緊 12 月遊戲又會推出新嘅 DLC，唔知工作室又能否喺遊戲中拎出誠意，令到玩家滿意之餘，又可以滿足到佢地啲投資者呢？

「遺落之族」DLC 喺 PS Store 黎緊兩日（11 月 10 日～11 月 12 日）公開免費試玩，有興趣嘅朋友不妨一試：