早前同大家介紹過一隻改篇自真人真事嘅第一視點恐怖遊戲《Maid Of Sker》（詳文按此），由於遊戲中使用了同現實中真實存在的「Sker House」作為故事鬼屋，而「Sker House」呢棟擁有近 800～900 年歷史嘅前修道院又真係靈異傳聞滿天飛，所以遊戲一公佈就馬上引起網友關注。

12 世紀時 Sker House 留影（圖片來自網路＠CatherineCavendish）

2013 年時 Sker House 留影（圖片來自網路＠bridgendbites）

點知，呢個時候，業主嬲豬了。

「Sker House」而家仲係真實存在嘅大宅，經過修葺改建後，已經無乜恐怖感覺；而呢棟「Sker House」嘅業主，喺網路上見到自己間屋無啦啦比人當成鬼屋，仲要用落遊戲入面，即刻覺得好唔受尊重，而家搵緊律師決定怒告遊戲開發商 Wales Interactive 咁話。

或者你聽到呢度會覺得「哦，咁係遊戲商衰吖，唔問過人就玩人地間屋」，之但係，呢間「Sker House」雖然係私人物業，但係由於歷史悠久，當地亦有唔少文學作品以及地方傳說係關於呢間屋的，就連英國最有力媒體 BBC 今年萬聖節都用「spooky spots in Wales」黎形容「Sker House」呢個景點（詳文按此），網友都不禁笑言，業主係咪要告埋啲文學出版社以及 BBC UK 咁話。

成步堂成日好忙.jpg

而根據 BBC UK 嘅報導，業主喺購入「Sker House」之後根本無喺裡面住過，反而係一直居住英國以外地方，2003 至 2013 年間更會每年開放大屋 28  日比旅客參觀，希望利用「Sker House」本身嘅知名度，搵到下一個肯出高價嘅買家咁話。

所以，佢想告遊戲開發商，係真係為左「聲譽」定係想「分一杯羹」……我唔知呀，我當新聞睇架咋，件事到底會點發展，當然係留待法律去處理了 w

遊戲中「Sker House」外觀和設定其實同現實完全唔同

最後介紹多次：遊戲預計 2019 年秋季上市，平台為 PS4、Switch、PC、XBox One，4K 60fps 對應。

延伸閱讀：
【真人真事改篇】無反擊之力！第一視點恐怖遊戲《Maid of Sker》只能靠聽覺逃走