我地 VJGamer 好榮幸地與本地遊戲零售龍頭 電氣良品 Perfect Denki、香港格鬥遊戲比賽組織 TLK 挑你機 及 BenQ HK 組成電競遊戲聯盟「Pentagon」，於剛剛過去嘅周末，我地就去咗澳門威尼斯人金光會展，與 WESG 合辦為期三日嘅《港澳遊戲展覽 2018》。

活動邀得我地友好媒體 Uwants 嘅昌昌親臨擔任大會司儀，昌昌喺三日活動入面做哂主副舞台兩邊主持，穩重而幽默嘅談吐令活動進行得加倍順利！

左起：活動主持昌昌 @ Uwants、TLK 召集人 Kim、VJGamer 總編森麻、Benq 香港銷售部總經理 Edmond、電氣良品老闆馬狄文先生

現場唔只有大量由電氣良品展出嘅歷代遊戲主機同埋絕版遊戲，仲有好多舊遊戲免費試玩；活動仲得到 Bandai Namco Entertainment HK 全力授權支持，喺場地設置咗 Bandai 遊戲專區，比大家試玩《太鼓之達人合奏咚咚咚！》、《DRAGON BALL FighterZ》、《NARUTO TO BORUTO 新忍出擊》《我的英雄學院》、《SOULCALIBUR VI》及《Gundam Versus》幾隻作品。

唔少爸爸同小朋友一齊感受當年精彩遊戲

現場目擊小朋友打太鼓叻過爸爸！LOL

Pentagon 包辦活動副舞台活動，而我地嘅重頭戲就係《Pentagon Fighter 2018》呢個《街霸 V》比賽！呢個比賽獲得 Capcom 正式授權舉辦，有豐富獎金；而喺 TLK 挑你機 嘅協助之下，唔止大量香港曾出戰 EVO 嘅經典臉孔或者新星選手參與，最令人興奮嘅，莫過於有「台灣最強」之稱嘅現役職業選手小向 Gamerbee 都出席比賽，與一眾街霸比賽選手互相切磋。

未正式比賽前，大家都爭相與 Gamerbee 進行對戰練習。左起：Gamerbee、Tse4

Amir 帶同女友到場支持自己

現場所有選手知道 Gamerbee 親臨都緊張萬分

不得不提嘅係，為當日比賽進行即時旁述嘅係本地著名遊戲 Caster 兼電競主播 Devils，Devils 連續為比賽講咗八個幾鐘，專業而輕鬆嘅旁述，令現場唔識打格鬥遊戲嘅觀眾都對比賽投入萬分。連續八個鐘呀，真心專業真心叻！

必須要多謝當日嘅香港選手，唔止黎參加比賽，仲即時上陣與 Devils 合作做比賽旁述，每位選手各有特色，令到比賽嘅旁述非常精彩。

左起：香港選手 DENESIS、Devils

左起：用 Ibuki 用到出神入化嘅香港選手 Chris Wong、Devils

有朋友話睇完比賽想學打《街霸》！

不過，當日比賽嘅賽果都認真出人意表，正當大家都以為  Gamerbee 穩操勝券之時，無諗到我地香港代表之一嘅 Denesis 喺準決賽中以一局之差取得出線資格；結果一出，全場觀眾不禁高呼 Denesis 為港爭光，Denesis 亦不禁笑言「打得好辛苦」。出局嘅 Gamerbee 亦甚有大將之風，留在現場繼續觀賽之餘，亦樂意接受在場人士繼續挑機切磋。

Gamerbee VS Denesis

有香港「最強 M.Bison 」之稱嘅 Denesis 笑言能夠與 Gamerbee 對戰已甚感榮幸，之後一定會繼續加油（圖為 Denesis 擊敗著名選手 Gamerbee 後露出一臉囂張神情 LOL ）

最後八強

八強戰絕對係龍爭虎鬥之戰，格鬥遊戲比賽嘅樂園就係，就算你唔識打都會享受睇嘅過程，一日未睇到最後一刻，都唔知鹿死誰手。活動最後好榮幸地，邀得 Capcom 亞太區負責人 Ricky 黎到現場為我地頒獎。

比賽勝利名單如下：

1st：Yangmian
2nd：Rockpon
3rd：Chris Wong

為期三日嘅《港澳遊戲展覽 2018》以及重頭戲《Pentagon Fighter 2018》喺一片笑聲中落幕，好感謝互相幫助嘅各單位，Pentagon 亦承諾將努力喺香港搞更加多 Console 遊戲活動及比賽。

多謝各位支持，以後請繼續多多指教！

如果你有興趣睇返比賽嘅片段，VJGamer 有為活動做全場直播，連結如下：

【預賽】

【八強決賽】

最後送上由電氣良品拍攝嘅活動精華片段：