《Spider-Man》首個 DLC「The Heist」推出咗兩日，相信有 Season Pass 嘅大家都已經打爆左。唔知你一開始對 DLC 有咩期望，我當時只係因為對黑貓呢個角色有興趣所以先會咁期待，無諗過劇本上安排又幾過癮。

（本文包含劇透注意）

「黑貓」作為原著漫畫裡面嘅經典角色，黎到遊戲入面，唔多唔少會有啲情節調整；但係，佢同第一代黑貓，亦即係佢老竇之間嘅強烈牽絆，呢一點就無乜點改變。

第一代黑貓 Walter Hardy 喺遊戲入面，其實一早出左獄，但係佢寧願個女信自己死左，因為佢唔想個女步上自己後路。不過，Felicia 係一個非常有才華嘅人，或者係情意結，又或者係執著，佢最終都係承繼左爸爸「黑貓」嘅名號，成為大盜。

Peter Parker 同 Felicia 喺「The Heist」裡面嘅感情線絕對非常有趣，雖然遊戲中並無交代佢地到底幾時一齊過、亦無交代佢地分手嘅原因。

但係，作為 Peter 嘅前度，Felicia 嘅言行舉止，絕對係現實中大家都可能遇過嘅嗰一種：令你好唔放心，大家其實無愁無怨也無恨，但係始終有啲距離跨不過，明知無可能亦唔想喺返埋一齊，但係對方有事，你依然會好擔心……嘅嗰種 Ex。

呢兩條友輪流倒吊 Play 真係好煩 /w\

既然情節係咁樣，已經同 Peter 復合返嘅 MJ，面對呢個「男朋友前度」＋「有能力嘅 Trouble Maker」嘅反應就非常真實兼有趣，一方面要維持理智幫 Spider-man 手去搵出各路資訊，另一方面，MJ 喺言談裡面聽得出 Peter 同 Felicia 其實有住好強 Connection，又忍唔住酸酸地。

不能被 MJ 看到的那些！！！

我家的 Peter 就係因為聽到 Felicia 呢啲說話就死心塌地（？）去幫手 /w\

喂，幾真實吖，啲後生係咁架啦！《Spider-Man》之所以咁受玩家歡迎，唔係因為個遊戲系統有幾特別出眾，其實有一個重要嘅賣點，係佢個劇本好貼地，好似真係發生喺你我身邊嘅事咁。

官方係咪私心「黑貓x蜘蛛」呢個 CP 架？個 Twitter（？）一面倒係呢啲留言，笑死我

好多人會拎《Batman Arknam Knight》出黎做比較，我又覺得兩個遊戲嘅劇本風格其實好唔同，《Batman》比較英雄意識啲，《Spider-Man》就比較貼近真實生活多啲，始終係有所分別的。

比較好笑嘅一點係，Felicia 話自己個「仔」比人拐走左，所以先要不斷偷野；然後 Peter 又真係信到十足，仲提心吊膽以為個仔係自己啲手尾，諗住是咪要負返責任咁話……呢一段真係明眼人睇都知佢係吹水，點止 Peter 仔你真係信，都唔知話佢純情小男生好，定話佢好人好 LOL

準備好做爸爸未？

以一個 DLC 黎講，「The Heist」主線長度唔多，一晚幾個鐘可以玩得哂，不過應該係考慮到大部份玩 DLC 嘅玩家都已經打爆機，所以敵人雜魚難度上似乎比正傳遊戲中提高左少少難度，主要係軍事武器多左。

是但啦，都係落去開無雙架啦

不過唔知是咪我好彩，又或者個 DLC 做得比較趕，「The Heist」裡面出現少少 Bug，雖然無礙遊戲，但係有時見到都幾好笑！例如下圖，啲路人見到 Spider-Man 行過喺度 Hyper 緊嘅時候……

Auntie 乜你企喺呢個位嘅？

至於新戰衣就只係一個單純嘅 Skin，完成哂主線就有大英蜘蛛裝，可惜並無相應配對特殊技能，呢一點就好似交貨咗啲。

DLC 入面仲有一條支線，係要完成「怪咖女」（即係專搞直播個八婆女仔）啲任務，個人認為要完美達成佢啲任務仲難過打大佬！不過，因為佢把聲實在太乞人憎太煩嘅關係，加上我已經趕住轉棚玩《Red Dead 2》嘅緣故……Sorry 我係無完成哂佢啲支線的。有耐性嘅玩家，你地比心機 /w\

比較令我驚喜嘅係呢個 DLC 嘅結局，雖然明知 Felicia 唔會死，但係臨尾咁樣爆炸法都咪話唔驚一驚；而「The Heist」亦以呢一樣野作為懸念，欲知後面劇情，請留意下回分解，要得到 11 月下一個 DLC 先知曉了。

知道 Felicia 唔見左＋Peter 唔駛做爸爸，你睇 MJ 幾開心？

Overall 黎講，呢個 DLC 不過不失，劇情上我玩得幾開心，期待 11 月再返紐約！