講到摔角 Game 我地真係唔多熟識兼且無乜留意，不過《WWE 2K》系列就不嬲都有班 Fans 支持，黎到今集《WWE 2K19》官方話有強大既星級陣容（Sor 我淨係識 John Cena  ），加上操控變得更為簡單爽快，我地就梗係要試試佢！

遊戲有極之多既模式，多到我連數都廢事數，而且明星陣容極為鼎盛，總計有超過200位可玩選手，相信 Fans 必定收貨。不過呢……前面都講過，我地完全唔係 Fans，對上一隻會煲既已經係講緊紅白機年代果隻摔角。咁黎到《WWE 2K19》又有乜吸引既地方呢？除咗畫面絕對一流、面相極似真人、動作表現流暢無偷雞之外，經過我地測試一段時間後，覺得遊戲內有三個模式都幾吸引下，想試下新野既朋友可以參考下。

對上一隻會煲既摔角已經係呢隻…….

不過係介紹模式之前點都約略講下遊戲玩法，攻擊方主要都係玩唔同類型既投技、鎖技，當使出投技之後就會有唔同既 QTE 選項，都幾簡單易明。不過每個角色啲招都多到嘔電，要記都真係有啲難度，幸好既就算用死果幾招投同鎖技都贏到人，就算係對戰遊戲苦手都唔會話完全無還手之力，所以一般黎講都會玩得幾愉快。

都有好幾種 QTE 要玩

至於捱打果一方面主要既反擊手段就係撳 R2 黎 Counter，不論對手既攻擊係格鬥、投撻等等都係靠 R2。黎到《WWE 2K19》反擊時間判定感覺上寬鬆咗好多，基本上見到對手差唔多出拳再撳制就避到，因為呢個原故所以同朋友玩既時候大家都會有攻有守，節奏明顯爽咗好多！避招雖然易咗，但係都要注意血條下面條反擊數量計，如果下下都反擊失敗就會無晒氣然後比人撳住黎打，所以就算有一時既優勢都係甜頭黎，掌握到反擊先可以笑到最後！

有晒教學，都幾貼心

咁講返推薦既模式，第一個想推薦比大家既就係 SHOWCASE 模式，呢個模式主要係比大家體驗 WWE 超級巨星 Daniel Bryan 既摔角成長旅程。唔好噓住，其實我都唔識 Daniel Bryan 係乜水，不過呢個模式就好似你玩 RPG 咁，玩家將會經歷佢係 WWE 生涯入面既 11 場歷史性對戰，玩既時候仲要你重現返當時比賽既情節，例如 Lock 手不成反被 Lock 之類，即使好似我地呢種完全未接觸過摔角既玩家，玩落去感覺都幾得意。

sor我真係唔識你……

要跟返當年佢擂台上出既招式

跟足晒成個流程先可以晉級到下一關

另外一個模式就係之前都有既 MyCAREER 模式，係呢個模式玩家可以自創屬於自己既摔角手，並且經歷由寂寂無名既小卒到成長到打入 WWE 舞台既感人（？）故事。不過最正既都係整人呢 Part，今集連膚色都有得比你自訂，你地睇下我整隻人係點款，就知道呢個模式幾過癮 XD

我隻人，可惜無得整條尾比佢

仲有得抽卡去豐富自己隻人

最後一個想推薦比大家就係 6-Man 模式，睇個名已經知道係支援 6位玩家對戰。簡單講就係 6條友互毆，打鬥中可以隨時轉換攻擊目標，即係見人地劣勢可以衝過去執雞！成班朋友一齊玩的話，呢個模式絕對係最歡樂！（而且大家都新手的話，亂撳都可以打到啲招出黎的）

好多筋肉人……

睇見都覺得逼

就算係非摔角 Fans，老實講呢隻 Game 都係幾過癮的，想輕輕鬆鬆互相笑下玩下有得，專心鑽研同人打 Ranking 又得，買隻黎看門口的確 OK 的，如果果排無野啱玩既，不妨試下。《WWE 2K19》已經推出，對應平台為 PS4、Xbox One、PC。