又有一隻 Pixel Art 風格既遊戲，而今次仲要係一隻橫向射擊遊戲黎。由日本獨立工作室 Onion 製作，充滿住神秘色彩既遊戲《Black Bird（黑鳥）》，就咁睇片似乎無乜特別，但係背後既製作團隊係非常之咁強勁，絕對唔能夠睇小！

《Black Bird》故事以一位可憐少女既遭遇作為開端。係好耐之前，有個女仔，佢死咗……。然後路過有個奇怪既紳士，用手上既拐杖督完少女條屍之後，變成一粒巨蛋，然後呢粒巨蛋孵化出一隻帶黎災禍既黑鳥，玩家們就係使用呢隻黑鳥黎對世界進行報復攻略。

遊戲未推出，好唔好玩到係未知之數。但淨睇條 Trailer 已經覺得美術部份非常美觀，原因係佢地背後強勁既製作班底。美術係由曾經擔任《半熟英雄》、《Super Mario RPG》、《Moon》等等作品角色設計既倉島一幸負責，音樂就由曾製作《幻想水滸伝》、《Beatmania III》既谷口博史負責。另外遊戲總監就由木村祥朗擔任，佢經手既作品有《No More Heroes》、《Shadows of the damned》、《Lollipop Chainsaw》等等，咁強既團隊做出黎既作品相信絕對唔簡單。

《Black Bird》預計於 10 月 18 日正式係 Nintendo Switch 日本 eShop 推出，售價 1,980 日圓。Steam 版則未有推出日期。