《The MISSING J.J.》顛覆固有遊戲玩法想過關必先自殘！

一直以黎無論咩類型遊戲都好，絕大多數都係要你盡量避免受傷、遠離危險，總之就係竭盡所能咁去避免死亡，呢個亦係大家根深柢固既慨念。但係最近有一隻遊戲《The MISSING: J.J. Macfield and the Island of Memories》（失落的 JJ 與追憶之島），就完全顛覆呢種固有遊戲玩法，玩家想過關就必需先自殘！

《The MISSING: J.J. Macfield and the Island of Memories》由隸屬 White Owls Inc. 既知名遊戲創作者 SWERY（末弘秀孝）主導製作，屬動作解謎遊戲。遊戲故事講述主角 J.J. 為咗搵返失蹤既好友 Emily，而黎到遊戲舞台「追憶島」，係呢座疑似受到咀咒既島上面，無論受到咩傷害，就算比火燒、受到重傷、肢解到得返個頭都唔會死（但仍然感受到痛楚）。而玩家就要係一直邊受到痛苦折磨既情況下，繼續前進尋找好友（要幾 FD 先會咁做……）。

基本設定就講完，遊戲最有趣既地方就係基於上述設定所創出黎既玩法。係之前美國PAX West 展上面，就有展出呢隻遊戲，而外媒 GameSpot 亦有紀錄 Gameplay。係片段見到遊戲開始既教學關卡已經非常引人入勝。

係下圖呢個初期教學關，玩家需要越過前面既罅隙前進，但係當接近時腳下既木板就會向下跌，由於罅隙上下都有尖刺關係，導致無法攀爬不能通過。一般黎講，正常動作遊戲都係諗「跑步加速、跳」，如果你係玩緊蘿拉既，呢種想法絕對正確。不過呢隻遊戲唔係比你咁玩的，要記住本作既人物仲勁過亞人，得返個頭都唔會死的。

好似搖搖板咁，一行過去就向下跌

係畫面左上角會見到角色目前身體狀況，顯示白色即係同身體連接住既正常情況，黑色的話就代表斷肢，而本作既中心就係點利用斷肢去破解迷團。講到呢度相信聰明既讀者已經諗到上面果 Part 點過，無錯，就係堆晒啲斷肢係木板尾端作為重量平衡，因為自身重量大幅減輕，所以經過時木板就唔會再下跌了，呢種玩法好變態治癒喔！

只要堆晒啲斷手斷腳係一邊，自己又輕咗，另一邊又有野平衡重量

當然如果只係一味玩斷肢，相信大家都好快厭，SWERY 亦都深明此道理，所以遊戲既謎題玩法極為豐富，都咪話唔考腦筋。好似下圖呢個謎題咁，要先被拆樓大波轟中，令整個世界上下倒轉，之後角色先可以到達本來去唔到既地方。然後好快就有另一謎題，就係前面有牆阻擋住。呢個時候，只要較啱位置，再去俾拆樓大波轟多下，自己就會好似炮彈咁轟爆度牆，真正係有質素既謎題。