大麻合法化一直係國外熱門議題，除左出哂名開放吸食大麻嘅荷蘭之外，隨住「Cannabis Act」嘅通過，南美烏拉圭亦將於今年 10 月 17 日正式合法允許民眾吸食大麻了。有人話佢可以醫 Cancer，有人話佢係草本藥方，唔理你點睇，而家，美國大麻合法化，你又會點樣運用你嘅生意頭腦，食住個勢搵真銀呢？

呢隻由獨立工作室 Devolver Digital 開發嘅大麻經營遊戲《Weedcraft Inc》就比機會一眾玩家做大麻生意，遊戲目前對應平台為 PC 及 Mac（Steam），預計 2019 年上市。

玩家飾演遊戲中一位大麻供應商，你唔止要種大麻供應市場需求，仲要做埋出貨、營運嘅工作，耐唔耐會有政治人士黎搵你麻煩、或者奇怪 NPC 黎找你晦氣，你要請咩員工黎幫手、你要點樣面對唔同嘅突發狀況，都係遊戲樂趣之一。

當然，遊戲核心價值（？）始終都係睇你點樣賣大麻致富之餘，仲要得閒建設國家啦～（笑）

基本界面，遊戲中會有時間流動，亦會有季節氣候變化

你仲可以自己配種栽培大麻…

種大麻唔難，到後期你可以請人返黎幫你打理；業務真正難玩之處，就係點樣擴展生意版圖，又要黑白兩道唔得罪！例如你可以收買警察大玩貪污 Play……

美國而家有 23 個州份大麻合法化（當然有所限制啦）但係大眾對於呢樣野仲係各執其詞，《Weedcraft Inc》唔單止係一隻遊戲咁簡單，其實遊戲中亦都用左好多貼近現實嘅事例黎做靈感，例如大家可以睇下面呢條遊戲 Announcement Trailer，裡面甚至有用到真實談及大麻法嘅新聞片段，仲有支持法例嘅參議員 Bernard “Bernie” Sanders 添 LOL

有興趣種大麻嘅朋友，記得留意住 Steam 嘅上架情報啦～