係日前東京遊戲展首度開放由 FromSoftware 聯同 Activision 共同開發既注目動作遊戲《隻狼：暗影雙死》 （Sekiro: Shadows Die Twice）試玩，但係由於不能拍攝既關係，所以一直都係純文字討論。不過早前 PlayStation 官方頻道正式公開實機演示片段，大家終於可以一睹呢隻係整個 TGS 無人通關既遊戲真貌！

《隻狼：暗影雙死》故事背景設定係戰國時代末期既日本，舞台則係稱之為「葦名」既國家。而主角所扮演裝備義手既「隻狼」就係為咗拯救被「葦名」所囚禁既「皇子」而戰鬥。不過大家唔好忘記，宮崎英高所講既故事有邊次係會咁簡單，相信遊戲真正既故事一定係更加「淒美」。

遊戲屬第三身動作遊戲，至於操作方式大致上同《Dark Soul》系列類似，都係左菇負責移動，右菇負責轉移視角，而主要攻擊按鈕就放係 R1，L1 就係擋格，三角鍵轉換忍具，R2 使用，回復藥、加防護符等等就變為方向鍵選擇及使用。基本玩法同一般動作相似，最大分別係主角義手上既鉤索，可以令角色快速移動、到達位置較高/無路去既地方、甚至係接近敵人等等，功能繁多。

鉤索使用都有限制，要啱角度先用得，好似圖中白圈地方其實係可以使用鉤索，只要角度正確圓圈就會變為綠色

戰鬥系統方面，主要攻擊手段就係使用右手妖刀「不死斬」既斬擊以及左手義手所施展既忍具攻擊。同以往《Dark Soul》、《Bloodbrone》等作品唔同，主角右手既妖刀「不死斬」係無得轉變既，換言之係無得換武器！但係根據之前既訪問，透過遊戲推進玩家將會學到唔同既劍術流派，從而可以施展唔同既招式。另外左手義手既忍具有多種功能，暫時已知既分別有：手裡劍、噴發/附加火焰、斧頭攻擊（面對持盾敵人必備既破防功具），另外正式版仲會有其他忍具。

遊戲當中有屬性設定，此中Boss 就係怕火屬

忍具「斧頭」係面對持盾敵人必備既破防功具

做得忍者又點少得「手裡劍」

亦都有 Buff 類道具

係展示片段見到，遊戲節奏比起《Bloodbrone》速度更快，但係難度絕對更高。係《隻狼：暗影雙死》每位敵人都會有一個「格擋值」，必須將格擋值打爆先可以施展必殺技「忍殺」，不過就唔係一定一擊必殺的。當然唔同既敵人「格擋值」亦會唔同，一般兵仔你狂按 R1 就得，條格擋值短到打爆咗你都唔覺。當然隱匿潛埋去用「背刺」都得。

但係當面對中 Boss 就會發現呢個系統難玩之處，要打爆敵人「格擋值」主要有二個方法，第一個就係普通攻擊，擊中敵人就會加少少「格擋值」；另一個方法亦都係最有效既方法，就係使用「格擋」。一般狀態下按 L1 擋敵人攻擊就會加敵人既「格擋值」，但係同時都會增加自己既「格擋值」。但係如果係敵人攻擊判定瞬間格擋，就可以彈反對方攻擊並大幅增加對方「格擋值」（類似《Dark Soul》盾反），不過如果敵人攻擊時出現「危」字，就代表該攻擊不能擋格，必需迴避。如果要玩得好呢隻遊戲，就必需掌握「彈反」呢個技巧！

畫面正上方既就係敵人「格擋值」，攻擊或者擋格對方攻擊就會增加

打爆「格擋值」就可以施展「忍殺」

另外之前所提過今集有原地復活功能，不過就只有2次機會。但係片段內見到有類似《Dark Soul》、《Bloodbrone》入面「執屍」既設定，只要打敗殺死你既敵人，就可以回復返一次原地復活次數。

當然都有「篝火」，除咗係做 Check Point 之用，仲會回復身上所有回復藥使用次數及原地復活次數

至於片尾既 Boss 戰破戒僧亦都極為吸引，而且係本作打 Boss 亦有全新演繹方法，玩家再唔係要扣晒 Boss 行血，而係要把握機會，盡快打爆對方既「格擋值」施展「忍殺」，頗為新鮮。

係整個戰鬥過程中，Boss 破戒僧完美咁話比大家聽咩叫「唔好貪刀」。即使 Boss 攻擊出現大硬值，由於遊戲節奏速度極快關係，偷位斬 1-2刀已經係極限，主力都係要用格擋、「彈反」去增加對方「格擋值」。當成功施展一次「忍殺」後，破戒僧將會施展忍術，係一定時間內場中將滿佈白煙，同時破戒僧將會消失，當再出現時會同時出現 2-3個分身，並且會於無法預計既角度出現並發動攻擊。我地綜合多方資訊下，發現係無人成功避到一次呢招，頗為屈機！係演示片段亦只係盡量於外圍游走拖延時間，雖然最尾可以擋到一下，但係都係無法避開分身既攻擊，如果呢隻只係本作既第一隻 Boss，咁《隻狼：暗影雙死》既難度應該係高得可怕！

仲未有人破解到呢招！

最後成功擊殺，製作人之一 Robert Conkey 開心到好似第一次打贏咁，證明係幾咁難玩……

完整示範影片：

《隻狼：暗影雙死》將於 2019 年 3 月 22 日正式推出，對應平台為  PlayStation 4 / Xbox One / Windows PC。