一直以黎邊個主機最多人玩都係好多人成日討論既話題，係香港邊部機排尾應該都唔洗點講架啦，但係 Nintendo Switch 出咗之後，不論玩家定係店舖都一致認為走勢凌厲。但係實際上到底各主機實際銷售數字又如何呢？最近外國統計網站 VGChartz 就出咗份報告，列出近呢幾年各大廠主機銷售數字及市佔率，五部主機入面你又估唔估到邊個最好賣？

VGChartz 既報告展示咗三大廠家用主機 PS4、Xbox One、Switch 以及二大手提機 3DS、PSVita 最近近四年既銷量狀況。一如所料，Sony PS4 一直都佔據榜首位置，而且係 2015 – 2016 年度 PS4 佔據咗大半既市佔率，作為佢對手既 Xbox One 銷量連佢一半都無。不過去到 2017 年任天堂推出 Switch 之後，形勢就有啲唔同。Nintendo Switch 一推出就已經超越咗 Xbox One 既銷售數字，而且仲持續上升，去到今年 PS4 市佔率為 46.3%，而 Nintendo Switch 已經去到 37.1%，只係用咗短短年半時間就有呢個數字，可謂非常驚人！

各主機最近近四年銷量狀況

各主機最近近四年市佔率狀況

與早二年數字相比

而手提機方面，近呢四年都係任天堂 3DS 獨大，雖然 2015 / 16 年 PSVita 依然有接近 27% 市佔率，但係去到今年已經淨返個位數，3DS 正式獨佔整個手提機市場。

再睇睇主機生命週期銷售數字，家用機市場 PS4 總共已賣出八千二百萬台，係非常驚人既數字。反觀 Switch 賣出接近二千萬台，的確係走勢凌厲，當然呢部主機推出市面只有短短既一年多，接落黎只要繼續保持呢種聲勢，推出更多佳作相信會逐漸逼近 PS4 銷售數字，而且 2018 年只有 Xbox One 同 Switch 既數字係比 2017 年好。

最後不得不提既係如果只計廠商主機數字的話，其實 PS 陣營同任天堂陣營主機總銷售量只係相差 600萬部，差距並非想像中咁大。