一年一度嘅「Nintendo Direct」過去，今次 Square Enix 宣佈即將會在 Switch 上面推出九隻《FF》正傳及相關系列作品（詳文可以睇呢度），之但係比較令我好奇嘅係，移植作品，有《FF7》《FF9》《FF10》等等，但係，《FF8》呢？

《Final Fantasy 8》首度推出於 1999 年，當時對應平台為 PS1，同年新增 PC 平台，去到 2011 年時以「PlayStation Classics」之名擺上 PSN，對應 PS3 以及 PSP。

但係，根據 SE 近年嘅作風，居然無將作品擺去 PS4 或者 Switch 甚至手機平台，的確有啲耐人尋味。

《FF8》唔受歡迎咩？唔會啦，論知名度佢同《FF7》差唔多，論遊戲評價，IGN 於 1999 年嘅 Best RPG 獎項就係比左《FF8》，而遊戲一首王菲主唱嘅主題曲《Eyes On Me》更加係唱到街知巷聞，連鬼佬都讚好，咁究竟點解近年熱愛炒冷飯……或者重提回憶嘅 SE 社，一直都好似將《FF8》擺埋一邊呢？

可能性（1）：《FF8》都係 SE 想重製嘅遊戲之一，不過以佢重製《FF7》嘅資源投放同進度黎睇，如果真係下一個目標係想重製《FF8》，我諗，等到 PS6 時可能會有機會見到？但係，連手機 iOS 都唔移植又真係耐人尋味左啲，你睇，連《FF7》未重製版本都原封不動落 Switch 同埋 PSN 啊 LOL

可能性（2）：我有諗過會唔會係版權費問題，例如係而家再出《FF8》要付出天價版權費比王菲首《Eyes On Me》之類？但係無理由得《FF8》有呢個問題吖，《FF9》首《Memodies of Life》咪又係一直再版沿用落去，所以去到呢度我又諗唔通了。

各位 FF Fans，唔知大家又有咩睇法？你地又想唔想《FF8》可以用冷飯形式或者重製面世？

最後我地一齊黎懷舊一下！！