開唔開心先？驚唔驚喜先？呢隻初始於 PS2 年代嘅經典中毒遊戲《塊魂》，無論經歷唔同機種嘅轉變，多番寒暑過後，依然係唔少機迷心中喜愛嘅遊戲之一！無複雜嘅故事，無複雜嘅操作，但係佢就係令到玩家唔知點解好上癮。

今次遊戲以《塊魂 Encore》嘅名義落 Switch，其實我又唔驚訝，反而覺得比我想像中遲添，呢種既適合個人挑戰、亦適合朋友共樂嘅遊戲，我原本以為一開始就會落 Switch 架啦 XD

遊戲玩乜？玩家飾演嘅小王子，為左製做出唔同嘅新星球，就要喺唔同嘅空間吸取物質，令到手上推動嘅「星球」變大；每一關卡嘅場景都唔同，有營地、有城鎮、有太空；而遊戲嘅好笑之處，就係喺唔同場景出現嘅物品有時都幾無厘頭，例如你永遠都唔會知點解條街一地都係章魚燒（！）而遊戲嘅另一賣點，就係佢用背景音樂選曲非常用心。

左上角就係你目前嘅星球大小，以及通關需要嘅 Size。對於未玩過嘅朋友黎講，就咁聽好似好簡單、好無聊、甚至有少少蠢，係咪？啱呀，我當年未開 Game 時都係咁諗，點知玩落去到後期係好有難度架！因為「星球」隨住大小變化，會有重量感難以推動；同時，遊戲又會計時，一味靠橫衝直撞係無可能通關的。

新星球達成！

黎到 Switch 版，遊戲嘅操作變化唔大，只係多左「可以用 Joy-con」玩嘅選擇，依然支援二人對戰（Local Play）。遊戲今年冬天推出，定價 3,200 日元（連稅），有實體有下載版，各位記得準備入 Game 啦（笑）