尋日同大家介紹過「人龍工作室」將於今年年尾推出嘅全新作品《JUDGE EYES 死神的遺言》，今日同大家分享下試玩版嘅感想！

相信遊戲公佈嘅時候，最吸引大家眼光嘅一定係由木村拓哉飾演主角「八神隆之」，不過呢個遊戲絕對唔會只係玩明星效應，今次呢篇分享都想同大家講多少少第一手試玩系統嘅感想。

試玩版份量唔算好長，主要比玩家感受遊戲新嘅幾種玩法。八神由律師變成偵探，所以遊戲中不乏要「尾行跟蹤」或者「追逐」嘅情節。如果有玩過《人中之龍 6》 嘅玩家，應該拎起手制一秒就上手，因為基本操作同《人龍》係完全一樣的，只不過動作方面比起《人龍 6》時明顯更加靈活敏感。

要憑特徵搵出跟蹤目標：呢一個玩法絕對無難度，早喺《人龍》時代，大家應該都有玩過「電話約女女」嘅支線，成日要約佢地喺廣場度等，然後要桐生搵出邊個係自己約會對象……嗰時畫質仲無而家咁好添 XD

尾行跟蹤：跟蹤一段時間先會觸發後續劇情，可能由於只係試玩版嘅關係，未感受到難度部份；只要唔心急、每一步都搵 Cover（呢種玩法好《P5》XD）基本上可以無痛通關。

題外話：不過八神師兄，你呢啲動作其實好明顯係跟蹤緊人，我心諗如果我係你隔離啲 NPC 一定心諗做乜勁（喂）

追逐：玩開人龍絕對唔陌生

作為一個偵探，當然亦要審視環境搵出可疑或有利嘅線索，可以調查嘅物事基本上都有提示，連隻街貓都可以係調查對象（笑）相信去到正式遊戲版時，呢啲元素會難度複雜返。

正如大家認知，今次嘅遊戲版圖依然係我地熟悉到倒轉都識行嘅「神室町」，餐廳「養老乃瀧」「韓來」呢啲我地食左好多年嘅地標依然建在，連坐的士嘅地點都同《人龍》一樣，地圖上變動唔大的，只不過畫面表達方式精細好多，成件事真係有返 2018 年嘅年代感。

特別係遊戲發售日為 12 月 13 日，即係已經入冬；而遊戲開始之時，正正係 2018 年 12 月 10 日，所以無論係 NPC 穿著或者遊戲氛圍，相信都會令玩家格外投入。

戰鬥動作方面比起《人龍》我覺得輕盈以及靈活左，同埋名詞方面有所更改，八神嘅超必唔再叫「極」，亦唔係叫「禁千弐百拾壱式・八稚女」，而係稱之為「Ex-Actions」；至於武鬥模式初始就已經有兩種（円舞＆一閃），目知未知道八神邊度學得一身好武功，不過預計遊戲中亦都會有傳統嘅「師匠」模式比主角學新技。

兩種武鬥模式可在戰鬥中隨時切換

円舞比較似中式武術

除左系統，呢隻《Judge Eyes》目前最令我期待嘅亦係劇本嘅全貌。一來人物模組真係做得好靚，二來淨係 Demo 版中短短幾句對白，我都明顯覺得工作室幾乎係為木村度身訂造「八神」呢個角色，因為佢嘅對白、口吻，根本活脫脫係木村近年日劇中嘅嗰種腔調同模樣！

我強烈建議識睇日文嘅玩家玩返日文版，因為超有日劇既視感，如果你同我一樣睇好多日劇，一定會比佢像真嘅過場動畫吸引到目不轉睛！

呢種幽默口吻好木村！

今次遊戲中仲有老戲骨「滝藤賢一」，佢都係日本影視界嘅熟悉臉孔了，佢喺遊戲中飾演刑事角色，而佢本人從影咁多年黎都做過好多次警察，所以我非常期待佢喺故事中嘅演出！

有興趣嘅朋友可以先行去日本 PSN 下載 Demo，如果係繁體中文玩家就要等官方再宣佈；利申唔係木村 Fans，不過呢個班底同埋故事設定，呢隻《死神的遺言》絕對係我今年 12 月必玩之作！不過我都好想問一句，Johnny’s 事務所應該會好保護木村嘅形象，唔知遊戲入面會唔會因此而無得用木村去玩水商售呢？LOL