正當全世界都諗緊《人中之龍》完左之後到底會有咩發展嘅時候，喺剛剛於東京進行嘅「PlayStation LineUp Tour 2018」，人龍工作室再次為玩家帶黎極大驚喜，為我地帶來呢隻名為《JUDGE EYES 死神的遺言》嘅全新作品，2018 年 12 月 13 日繁體中文及日文版同時上市！

木村拓哉，唔理你係唔係 Fans，你點都起碼睇過佢幾套作品；無論係 2001 年大熱嘅日劇《HERO 律政英雄》，定係最近佢同二宮和也合演嘅電影《檢察狂人》，佢做律師嘅專業形象絕對係深入民心！

唔知係咪睇中左呢一點，《JUDGE EYES 死神的遺言》唔單止以木村拓哉為故事主角，同時亦保持住《人中之龍》系列嘅特色，遊戲片段中不乏見到木村喺「神室町」行走嘅場面！

目前知道木村嘅角色「八神」，唔單止承受住痛苦嘅過去，一度曾經自暴自棄地生活；但係，因為好想同爸爸一樣成為律師，所以，佢開始向住成功律師嘅道路邁進。

但係，佢成功幫到嘅嗰位疑兇，居然喺「無罪釋放」之後，亂刀殺死同居女朋友，令八神再次對「律師」「公義」產生動搖……

遊戲 PS4 平台限定，今晚開始於日版 PSN 已經可以玩到 Demo，如果係中文版玩家就要再等官方宣佈。《人龍》系列唔再炒冷飯，用全新角度同埋劇本為系列作寫出全新嘅故事，呢一點令我好感恩亦好期待，希望各位今年 12 月 13 日同我一齊進入木村！！我意思係進入《死神的遺言》！！

遊戲 Trailer 如下：