有網友買呢篇《小龍咖啡廳》會唔會寫感想，其實我喺落筆前都猶豫咗好耐。有留意開我地網站或者呢者遊戲嘅朋友，應該都知遊戲一開始就打住「《牧場物語》之父新作」嘅名號，令到大家倍有期待，包括我在內。
咁，酒過三巡，玩過一輪，感覺如何呢？嗯，話佢垃圾又未至於，但係，我亦好難講得出「喂正野黎好好玩！」呢句說話。
《小龍》係一隻集合育成、經營、探索元素嘅遊戲，聽落好多野玩，好多變化，畫風又得意，剛剛開 Game 時，我都幾有期待的。遊戲一共有 12 個章節，每一章節都會有一個新角色黎到玩家嘅 Cafe，然後佢地各自有一啲故事或者疑難，玩家就需要煮出 NPC 需要嘅料理去鼓勵（或者安撫）佢地。
但係……
12 個 Chapter 嘅遊戲，理應係好襟玩；遊戲世界地圖都算幾大，聽落好似好有自由度，不過，或者遊戲係子供向啦，佢嘅故事劇本其實趣味度唔高，都係一啲你默默睇完，然後去到後期會想默默 Skip 嘅情節。
至於遊戲一開始病倒嘅母親大人，我多次想去表現一下孝心，奈何佢一直都係陷於昏睡當中，對話不能；所以，呢個遊戲如果係想製造「兒子生性病母感安慰」呢種溫情感動位嘅話，對唔住，無呀；如果係想展示「每個角色嘅經歷都為主角同時帶來成長」呢啲古早意義嘅話，同樣地，我真係咩都 Feel 唔到呀……
「OK，放棄情節部份唔緊要，如果系統好玩，遊戲一樣有分加！」，我同自己咁講。
條龍係得意嘅，幼年期時令我回想起我隻貓細個時痴身嘅嗰個樣
遊戲最重要嘅系統，共有三部份，分別係「外出搵材料以及食譜」「烹飪料理」以及「經營餐館」。好可惜三個部份我都有好多不解嘅地方，下面逐樣講。
隨住地圖可以探索嘅部份越大，玩家可以搵到嘅材料同食譜就越多種類。係嘅，每次搵到新食譜同埋新食材係開心嘅，但係，因為遊戲入面有分日夜的，日頭要招呼客人，基本上你係行唔得遠，所以只有夜晚收左舖先可以同條龍出去搵材料。
豬籠草種出芥辣！！LOL
但係，點解我話個遊戲系統唔治癒呢？
我諗，出去搵材料時偶然會有 Bug（例如啲肉卡在喺奇怪位置拎唔到）之外，其他野我都可以無所謂；但係，呢個遊戲另一重點係玩經營，你個經營做得唔好，咁可以點？
我覺得「餐廳營運」嘅部份，可以改善嘅地方真係太多。除左玩家本人之外，其他四個 NPC 都係好令人激氣的，就算人幾多都好，佢地都會無啦啦走去彈結他、發吽哣、發夢、掃地……點解？因為佢地嘅角色設定就係「唔完美嘅員工」，所以，玩家要成為「獨當一面嘅店主」，就要招呼客嘅同時，湊埋佢地啲狀況。
即係話，你有四個豬隊友。
豬隊友另外一個令人玩到「/w\」嘅地方，係系統設定。
《小龍》嘅所謂「經營」其實係做得非常粗糙的，首先你唔可以幫其他隊友安排岡位，佢地係見到眼前有咩要做就做乜，就算間舖坐滿哂人，全部未上菜、未落單，佢地都可以淨係同你慢慢執碟的。喂阿哥，點解要咁對我？既然你都比左幾個 NPC 我用，點解唔比我設定埋佢地嘅用途，例如係「上菜」或者「落單」咁樣？
另外一點，係移動問題。我諗呢個唔係 Bug，只係系統寫得唔好，玩「經營」嘅時候，玩家一旦拎住料理或者污糟碟，就會行得好慢，咁無野的，你要話比大家知「行得太快易打瀉」係咪？OK，我明。
但係，我唔明點解移動嘅部份要咁樣：例如，我拎住碟野，條路好窄，迎面有豬隊友 NPC 行緊入黎，你個系統，一係就寫到我地互不影響、各行各路；一係就寫到 NPC 會比玩家撞開，好似啲 RPG 咁。
邊有「NPC 行埋黎會將你係咁向後推」嘅設定架？！
而你知唔知道最令我反白眼嘅其實係，我去到後期先發現，就算繁忙時間你無返去幫手，原來啲人嘅評價都唔會跌，所有野都維持到，咁我又唔明了，評價嘅基準係乜野？
其實遊戲中所有「基準」我都唔明佢點 Set。例如整料理，原來係小型音 Game 黎，但係根據我玩左超過十年音 Game 嘅經驗黎講，《小龍》入面個「料理音 Game」啲準確度……可以做得好少少（或者索性唔好用音 Game 嘅方式黎表達 orz）。同時，因為所有料理要全部「Excellent」先有五個廚師帽，而你個音 Game 準確度又唔係咁準，有時都玩到幾躁底 orz
初期食譜
既然講起基準，我又講起啲食客評價嘅基準。呢一點我都覺得係個謎。我去到後期先發現，一個料理，五個同四個廚師帽，其實對班 NPC 黎講，係無咩分別的（抱頭）當我發現呢一點之後，我覺得之前係咁要 chur 到五頂帽嘅自己好蠢（喂）
同埋，我都幾肯定佢地係味痴 XD 因為我之後烹飪淨係睇點樣可以整到「+1」（即係料理入面有無使用 Rare 食材），例如咖哩飯我會落條鱔、整甜品我會落芥辣之類，總之多星星就得，呢一點我反而玩得幾歡樂！我係無良食肆 LOL
盡量點都落 Rare 食材
遊戲綜觀評價我會咁睇。如果玩家係小朋友，或者非 Hard Core Gamer，或者你但求輕鬆想玩下啲簡單 Game，呢隻《小龍》仲係有佢嘅吸引力喺度，一來食譜、食材種類好多；二來，地圖算大，飛埋出啲小島呀山頂呀，都用哂你一日時間架喇；同埋，啲繪本風圖畫係得意嘅。
如果你唔係好似我咁，喺呢種遊戲入面追求完善系統設定，而只係想擺喺部機度，得閒玩兩野嘅話，OK 啦，睇荷包做人啦，至少我玩比啲小朋友睇時佢地好開心，玩比啲女仔朋友睇時佢地話「好得意」，咁囉。
同埋，我起碼而家都已經玩到第十章，雖然係有唔滿意嘅地方，但我都仲肯玩埋落去嘅，可能因為我玩開 RPG 有收集強逼症啦，硬係想收齊哂啲食材同食譜……orz
每次條龍滴汗，我都會心諗你係咪嫌我肥
或者係遊戲一開始有《牧場物語》光環，所以我期待太多啦 /w\
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。