已經完結左嘅《Final Fantasy XV》到底有咩優點缺點，今日就唔講太多，我淨係知道 Square Enix 應該花左好多資源去做呢個遊戲，所以用得唔好浪費，《FF15》完左之後，手機版遊戲一隻接一隻，先係《FF15: A New Empire》，然後係將遊戲全體 Q 版化變哂圓碌碌嘅《FF15 Pocket Edition》。咁無野嘅，唔理你想玩課金商法又好，真心只係想更多人玩到呢個遊戲都好，出落手機度的確會令遊戲更快普及化，之但係……

你將一隻原本喺 Console 嘅遊戲整成手機 Q 版 Game 之後，再將佢 HD 化落返 Console 又係咩玩法？媽呀我睇唔透呀！

（掩面）

大家無睇錯，手機版《Pocket Edition》原來不知不覺間 HD 化左，反將你一軍，居然轉個頭而家又落返家用機！雖然今次呢個版本仲會落埋 Switch 聽落好似仲有少少吸引力，不過，對於我呢啲第一手玩《FF15》嘅玩家黎講，呢件事都仲係令我想大嗌一句「Square Enix 你搞邊科 orz」

即係咁，《FF IV》呢啲舊作，你將佢 Q 版重製落手機我可以理解呀，因為年代久遠，呢種平台轉換對於好多年輕玩家黎講，絕對係一個好機會可以玩返經典作品！不過《FFXV》都唔係舊到咁吖……LOL

咳咳。講返遊戲本身先。手機版《Pocket Edition》剛推出之時，我都有下載過黎試玩過，不過，因為之前已經玩過原版，所以就無課金買完整版手機遊戲了。

簡單黎講，佢係一隻簡化版嘅《FFXV》，無論係戰鬥定係操作都非常簡單，不過官方都好努力地將畫面同埋故事 100％ 還原返落手機度，有興趣了解手機版嘅朋友可以【參考呢一度】。

原版遊戲中嘅 ATB 輸入同埋「Parry」避擊都有重現返

王子偷襲 Play

其實我唔係話緊 Square Enix 出手機版呀，不過一諗到同樣劇本但唔同風格嘅《FF15》同時出現喺 PS4 上面，我就覺得件事有少少令人無言 LOL

不過，如果係未玩過《FF15》嘅朋友，又唔想玩手機版嘅朋友，又或者，係玩唔掂原版《FF15》但又想知故事講乜嘅朋友，機會黎啦，有 PS4 有 XBox 仲有 Switch，今次想合家歡又得，想輕鬆玩又得！！

遊戲中經典場景都有好好體現返出黎：

寫到呢度，我嘅感想就係，Square Enix 好叻叻，善用資源！HD 化左嘅《Pocket》會係點樣？大家可以睇下面呢條 Trailer：