B社公開《Fallout 76》主線劇情訊息玩家最後任務「發射核彈」

過多二個月《Fallout 76》就出啦，但係大家都知道今集將會變為線上多人遊戲，會變成點真係好多未知之數，不過有一點可以肯定既就係仍然會有主線劇情同任務，Fans 可以放心先。而係日前外媒 GameInfomer 既一篇報導就透露唔少遊戲資訊，當中最吸引既就係有關遊戲主線劇情相關訊息。

係報導入面製作人 Todd Howard 透露，當玩家係 76 號避難所出黎之後，就會收到祕密指示，而呢啲指示可視之為教學，令玩家熟習遊戲基本操作以及內容。然後任務會指示玩家係地圖上四處走動，並且需要達到一定等級先會結束呢個部份。另外遊戲中接受任務既形式大部份都係透過對講機獲取，當然亦有部份係透過 holotapes、筆記本、終端機，甚至係去特定地點獲取，當然玩家可以獨自體驗呢啲任務，或者組隊遊玩都可以。

另外 Todd Howard 提到係本作主線任務結束時，玩家需要發射一粒核彈。而核彈係遊戲內既一種機制，同時亦都係主線劇情既一部分，遊戲亦都會有保護機制，所以唔洗點擔心比人「核平」。當然，呢個係遊戲非常後期既任務，而且就算玩家堅持要射核彈，但係過程中仍然可以選擇其他任務，我地會有一個 Menu，當中包含玩家可以隨時選擇自己想玩既任務。

之前大家曾經諗過《Fallout 76》變成線上多人遊戲會唔會好似一般 Online Game 咁，係地圖上周圍都係人，呢一點報導亦有提到。係遊戲中每張地圖上將會設定最多只有 24 位玩家，而且地圖既面前係《Fallout 4》既四倍，所以應該好難會撞到其他人。另外亦有提到本作將不設等級上限，而且相關經驗值非常容易取得。