今日（9月6日）先正式推出既全女班格鬥遊戲《SNK Heroines Tag Team Frenzy》，一直都試玩既機會唔係咁多，所以係琴日香港區代理 Epicsoft 特別搵咗 Rosa Ma 同埋 Hins 直播試玩呢隻遊戲，原來呢隻遊戲除咗格鬥部份吸引之外，最特別既係當中多姿多采既道具，唔少用起上黎非常惹笑！

Rosa Ma Cosplay 不知火舞上陣

入 Game 第一件事，梗係睇下有咩角色先啦，二位亦都知大家想睇乜，立即就為大家展示遊戲登場角色。《SNK Heroines Tag Team Frenzy》登場角色有十四位，每位玩家可以選擇攻擊者及支援者二位角色。最特別既就係《餓狼傳說》系列主角 Terry 以女性型態登場。令外每位角色亦有基本三套服裝選擇，唔洗額外買衫都算有啲良心。

女性化之後……我都係 J 唔落……

新增既服裝趣味十足，不知火舞呢套女神裝就非常得意

正式開波隻抽之前，Hins 為大家簡單講解遊戲玩法。今次《SNK Heroines Tag Team Frenzy》同以往正統拳王作品唔同，走比較輕鬆既路線，操作亦作出簡化。為咗令格鬥初哥可以享受到格鬥遊戲既快感，本作採用超簡易指令，只需要用 O 鍵再配合前後左右方向鍵即可使出各種必殺技，超必殺技亦簡化到按 R1 就可以使出。

本作新規則：必需使用超必殺技先可以擊敗對手

係示範入面，我地見到血條位置有一半係彩色的，而彩色既部份其實係必殺技量值。本作角色使用任何必殺技都需要消耗一定量既必殺技量值，消耗盡之後使出既必殺技除咗威力會大幅下降之外，亦會變成弱化版。例如不知火舞既飛行道具係必殺技量值耗盡時使出，就只有半個身位既飛行距離。當然必殺技量值係會慢慢回復，亦都可以切換成使用支援者戰鬥。

彩色部份為必殺技量值

係每場戰鬥開始時，血量及必殺技量值各佔一半

隨住血量流失，必殺技量值將會提高上限

本作另一賣點就係多姿多采既輔助道具，只要擊破場上既黃色波波就會得到隨機道具，當中除咗有防礙敵方前進既板、雙方都會受到傷害既炸彈之外，最搞笑既道具莫過於打格仔道具，使用之後成個畫面都打晒格仔，非常頂癮！

唔係機件故障，呢個係道具效果黎架！

比較有趣既係，示範中係見到本作支援四人同時遊玩！不過由於佢地只得二個人，到底係點樣四人同時遊玩就未知啦。另外除咗基本單機對戰外，仲有故事及線上對戰等模式。

有得四人同時遊玩！

基本要有既模式都齊，另外仲有訓練模式無顯示到

最後二位仲示範遊戲入面自訂角色呢 Part，每位角色都擁有超大量配件可供選擇，有趣味性亦有美化角色配件，而且每件配件都有四種顏色選擇，用遊戲內得到既金錢就買得到，唔洗課算係咁。

配件豐富，唔洗課

比較少見選項：可自定角色語音，雖然都係同一位聲優，不過會用唔同語氣演繹

仲有得好似芒亨咁設定卡片，啲 Pose 仲幾騎呢

示範各種玩法之後，直播都接近尾聲，當然要提提大家《SNK Heroines Tag Team Frenzy》將於 9 月 6 日正式推出，對應平台為 PS4 及 Nintendo Switch，注意首批遊戲會有特典「SPECIAL SOUNDTRACK」贈送，內含歷代 SNK 人氣女主角既主題曲，並且係特別為本作重新編曲既版本，當然主題曲「cresc.」、由坂崎百合（CV：加隈亜衣）演唱既「Calling Heart」等等都會收錄係入面啦！