《巫師3》係全球都叫好又叫座，除咗遊戲做得出色之外，入面既小遊戲「昆特牌」仲非常之受歡迎，之後仲獨立出咗款同名卡牌遊戲添（雖然係香港唔多人玩）。而新既《巫師》作品就係由《昆特牌》（GWENT）呢隻卡牌遊戲內既單人戰役模式發展出黎，並命名為《Thronebreaker: The Witcher Tales》。

《Thronebreaker: The Witcher Tales》呢隻遊戲既誕生都真係幾奇特，起源係動作角色扮演遊戲《巫師3》，然後發展到獨立卡牌遊戲《昆特牌》，再由《昆特牌》既單人戰役模式獨立發展成《Thronebreaker: The Witcher Tales》呢隻 RPG 遊戲。而且開發廠商 CD Projekt Red 仲表明呢隻遊戲唔會只係單純既卡牌遊戲，而係根據昆特牌世界觀構架既正統 RPG，會擁有自己既完整故事，仲表明基本遊玩時間達 30 小時以上。

玩家係今次新作將會扮演北方利維亞女王 Meve（梅芙），故事講述利維亞被他國入侵，係呢個時候 Meve 別無選擇，再次戰鬥保護自己既國家。玩家係漫長既戰爭中，必需作出多種選擇。當然遊戲入面不論角色、裝備以及部隊都可以升級。而且 CD Projekt Red 亦都話如果今次作品成功，將會改編更多戰役，希望喜歡《巫師》既朋友，就算玩家無玩過《昆特牌》都試下呢隻作品。

《Thronebreaker: The Witcher Tales》將於今年底上市，對應平台暫時只有 PC 版本。