最近我地成個編輯部沉迷玩緊嘅《Strange Brigade 異國探險隊》認真非常好玩，亦非常襟玩；呢隻遊戲集合解謎、射擊、探索三種元素於一身，亦有持久戰玩法，如果你覺得最近悶悶地、無咩協力 Game 好玩嘅，喂，快快手去買隻碟返黎同朋友出發搵寶藏啦（或者可以上美版 PSN 買）

玩家可以飾演嘅探險隊成員一共有四個，四人嘅超必同埋速度都有些許分別，我自己因為射擊技術一般，所以就鍾愛用呢個專長遠距離射擊嘅小白臉角色。遊戲嘅 User Friendly 之處係，如果你想嘅，四條友用同一個角色落場都得。

我原本一開始都好驚自己玩唔掂，因為我一向係射擊手殘人士，不過遊戲喺戰鬥方面嘅難度都幾老少咸宜，每個角色身上配備兩種槍械、手榴彈、以及超必技能，勇武派嘅可以行上前面玩爆頭近攻，我呢啲保命派嘅咪企喺安全位置玩遠射囉 orz

遊戲當中有相當重嘅「收集」成份，例如要刷錢買更強火力嘅槍械；而槍械上面亦可以安裝「技能石」，技能石照道理就係喺探索中開箱隨機獲得嘅，不過我地編輯部都寫過篇「30 秒刷技能石」嘅攻略，想快嘅朋友可以參考下 w

技能石共有九種，點樣搭配最好用，大家亦可以參考埋呢一篇【武器技能石能力解說攻略】。

好喇，講左咁耐射擊，到底解謎方面又係點呢？唔知大家有無玩《Destiny 2》打 Raid，如果你射燈可以無痛通關，一，你要多謝你有一班好隊友；二，你同返呢班隊友玩呢隻《Strange Brigade》應該就慳返唔少腦力！

遊戲當中嘅解謎可以話係由淺入深，有部份寶藏門試三次就會當挑戰失敗，至於主線需要解謎嘅地方難唔難就真係見人見智。

有部份場景我單機玩嘅時候，都真係諗左一陣先解到；但係我強烈建議各位一係單人遊玩，一係就搵朋友玩，如果玩公開房嘅，我經常遇到其他玩家亂射搞到解唔到謎＋開箱比人搶石嘅狀況，除非你份人好無所謂啦，如果唔係都幾無癮的 orz

解謎：大多需要觀察同區域中嘅符號，仲有佢地嘅出現頻率或次序。主線謎題解錯可以重新黎過（雖然有時解錯會出怪）但係寶物房就要重新開關先有得再試了

寶物房其實好易解，唔好亂射就一定解到……但玩街場時啲人成日都唔睇指示亂咁黎。ROAR。

同朋友玩嘅好處：大家需要咩石可以平均分配，爭咩噺打和 super 咪幾好，反正個 game 大家都要刷錢～咪打多場 w

除左錢箱同技能石箱，開箱有時仲會係遊戲中其他需要玩家收集嘅物品，例如係「信件」或者其他非實用性質嘅「寶物」，除左主線箱之外，所有物品基本上係隨機出現的，所以同朋友玩可以減少收集時間。不過要注意嘅係，錢係先到先得的，千祈唔好玩到因財失義呀～（笑）

另外建議玩家佩戴耳機，因為每個地圖都有一度隱藏寶物貓門，需要玩家沿路搵出六隻藍色貓貓先可以解鎖到；而玩家接近呢啲貓時係會有貓叫聲的～呢度寶物門好值錢架，人人有份，所以唔好 Miss 左！

通常係好似啲貓比人踩親條尾咁嘅聲 LOL

怪物方面種類都幾多元化，圖中呢啲骷髏兵就好濕碎啦，《Dark Souls》入面大把比你生得更樣衰嘅（喂）

隨住遊戲版圖推進，難度亦會增加，嗰啲有強力撞擊力嘅牛魔王、用火又行動飛快嘅魔法師，都幾難打的，加上遊戲中 HP 藥水其實係好罕有的，雖然死左可以由隊友叫返醒你無限復活，不過每次復活之後都係得返紅血架咋……所以大家勇武之餘都要睇住命仔做人 orz

有一樣野要讚嘅係，角色動作反應方面做得幾好，反應敏捷俐落，玩左幾日 so far 我唔覺動態上面有咩大 bug，滾動或者攀爬做得好順暢。

戰鬥人亦可以善用場地上面嘅機關配置，喺人多手腳亂嘅情況之下可以幫上大忙，例如圖中呢個打中燈就會變旋轉攬拌機嘅機關、亦會有噴火呀、大鐮刀之類嘅配置，殺傷力極高！當然用左機關就小心唔好自己衝埋去啦 LOL

打死怪就可以儲超必（圖中藍色標示）

綜觀黎講，呢隻《異國探險隊》我覺得係近期非常值得推介嘅一隻四人協力遊戲，故事模式版圖夠大之餘，仲有持久戰模式可以比玩家挑戰；好可惜持久戰我次次都玩到好鬼緊張所以唔記得 Cap 圖！Sorry！

但係，如果你打厭左《MH》，玩《Gundam Operation 2》又玩到躁躁地，我諗呢隻遊戲係你黎緊唔錯嘅選擇喔！

版圖大

持久戰：我話比你知好鬼痴線（掩面）