Capcom 其中一樣最擅長既技倆就係炒冷飯推出舊作重出，當中不乏著名作品重製版。不過原來 Capcom 既製作團隊思維已經比一般人更上一層樓，係最近外媒 Game Informer 既一個訪問入面，佢地就透露佢地有意去重製《生化危機 重製版》，唔知真係有呢隻作品推出既時候，大家又會唔會受落呢？

其實今次訪問最主要係睇到《生化危機 2 重製版》既成功，咁到底初代既《生化危機 重製版》會唔會有機會再重製呢？甚至更早期既紅白機恐怖遊戲《Sweet Home》會唔會有機會重製。作為《生化危機 2 重製版》總監門井一憲先生就話「其實距離初代《生化危機 重製版》上市已經過去咗好多時間，如果去重製呢個重製版並唔會係一件可笑既事情，相反我個人黎講仲覺得好有趣。」

另外佢亦有提到「有好多 Fans 都想重製自己心目中最愛既遊戲，但係我地現階段唔會做出任何承諾。 當然我地仍然會為未來係會保持可能性，並且去實現我地認為最有意義既事情。當然我地唔想只係一味懷舊，我地仲希望帶出大家對原始遊戲既感受。如果可以的話，好希望可以重新構想，成為 20年前既舊玩家同新玩家之間既橋樑。」

其實初代我都數唔清爆咗同買咗幾多次……

至於更早期既紅白機恐怖遊戲，亦都算係《生化危機》精神前作《Sweet Home》，呢隻遊戲亦都係當初 Capcom 製作《生化危機》原因之一。門井一憲先生就話因為呢款遊戲實際上同一部電影有緊密關係，加上 Capcom 已經唔再擁有呢隻遊戲既版權，所以佢地無再發行過呢隻遊戲。

當然作為 Fans，如果 Capcom 用今次《生化危機 2 重製版》既型式去重製初代、第三集、零等等，我絕對表示歡迎，但係如果只係《生化危機 重製版》二次高清/4K 化的話，我就真係唔會再中計了。最後提提大家，《生化危機 2 重製版》將於明年 1 月發售，對應平台為 PS4 / Xbox One / PC。